चितवन फागुन १२
गल्फ इन्टरनेसनलको इजाजतपत्र प्राप्त नेपाल ल्युब आयल लिमिटेडले चितवनमा आज खुद्रा विक्रेता (रिटेलर) र प्राइभेट ग्यारेज मेकानिक्स बीच भेटघाट तथा अन्तरक्रिया गरेको छ । गल्फ लुब्रिकेन्ट्सको नयाँ उत्पादन, स्किम र भावी योजनाको बारेमा विक्रेता र मेकानिक्ससँग अन्तरक्रिया गरिएको हो । कम्पनीले यस्तो कार्यक्रम विभिन्न डिलर क्षेत्रमा गर्दै आएको छ ।
नेपाल ल्युब आयल लिमिटेडका डिजिएम दिवाकर मिश्रले बजारको मागको विषयमा खुद्रा विक्रेता र मेकानिक्स मार्फत जानकारी लिइने र सोहि अनुसार कम्पनीले कार्य योजना बनाउने बताए । यस वर्ष डिजेल इन्जिन आयलका रिटेलरहरुलाई लक्षित गरी सय देखि १० हजार लिटरसम्म आयल विक्री गर्नेलाई कित्लीदेखि मोटरसाइकलसम्मको स्किम राखिएको उनले बताए ।
विद्युतीय गाडीको कारण ल्युबको व्यवसायमा असर परेको उनले बताए । ‘अहिलेको आर्थिक मन्दीका कारण खुद्रा व्यापारीदेखि ठूला आयातकर्तासम्म मारमा परेका छन् । लुब्रिकेन्ट्सको व्यापार पनि केहि घटेको छ, यद्यपी अहिलेको मार्केटमा हामी एक नम्बरमै छौँ’, उनले भने ।
चितवनमा गल्फ इन्जिन आयलको बजार राम्रो रहेको उनी बताउँछन् । ‘चितवनमा हाम्रो दुई पांग्रे गाडीमा हाल्ने इन्जिन आयलको बजार धेरै राम्रो छ । दुई पांग्रेको हकमा हाम्रा नौ प्रकारका उत्पादन छन् । सय सिसि देखि २५० भन्दा बढी सिसि सम्मका मोटरसाइकलमा प्रयोग हुने उत्पादन छन् । यहाँका ग्राहक र मेकानिक्सहरु सन्तुष्ट हुनुहुन्छ’, उनले भने ।
नेपाल ल्युब आयलले सबै प्रकारका लुब्रिकेन्ट्स उपलब्ध गराउँदै आएका उनले बताए । नेपालमा २०४२ सालमा यो कम्पनी भित्रिएको हो । यस कम्पनीका उत्पादनको मूल्य अन्तर्राष्ट्रिय उत्पादनहरु सरह राखिएको छ । नेपाल ल्युब आयलको आधिकारीक डिलर आशिर्वाद अटो ट्रेडिङका सञ्चालक एवम् नाडा बागमती प्रदेश प्रमुख सुवास कँडेलको अध्यक्षतामा भएको अन्तरक्रिया कार्यक्रममा चितवन अटोमोबाइल एशोसियसनका अध्यक्ष कुल बहादुर क्षेत्रीको प्रमुख आतिथ्यता रहेको थियो ।
उक्त कार्यक्रममा चितवन अटोमेकानिकल व्यवसायी संघका अध्यक्ष रामबहादुर तिमिल्सिना र चितवन अटोमोबाइल एशोसियसनका पूर्व अध्यक्ष कृष्णप्रसाद काफ्ले लगायत सहभागी थिए ।
