चितवन । भरतपुर महानगरपालिका–२ क्षेत्रपुरमा रहेको फोर्व्स कलेजले तेस्रो संस्करणको अन्तर कलेज कुलिनरी र पावरपोइन्ट प्रिजिन्टेशन प्रतियोगिता गर्ने भएको छ ।
कलेजले फागुन ९ र १० गते नवलपुर र चितवनका विद्यालयमा कक्षा ११ र १२ अध्ययनरत विद्यार्थीबीच प्रतिस्पर्धा गराउन लागेको आज आयोजित पत्रकार सम्मेलनमा जानकारी दिइएको छ ।
कलेजका अध्यक्ष राजकुमार दाहालले कुलिनरी र पावरपोइन्ट प्रतियोगितामा भाग लिन कक्षा ११ र १२ मा होटल म्यानेजमेन्ट र कम्प्युटर विज्ञापन अध्ययन गरेका विद्यार्थी हुनुपर्ने बताए । तेस्रो संस्करणको प्रतियोगितामा कुलिनरी प्रतिस्पर्धातर्फ पहिलो चरणमा विद्यार्थीहरुले क्लासिक चिकेन क्लब स्याण्डविच विथ फ्रेन्च फ्राइज र फाइनलमा चिकेन मिटबल विथ टोमाटो सस बनाउनुपर्ने दाहालले बताए । त्यस्तै पावरपोइन्ट प्रिजेन्टेसनतर्फ विद्यार्थीहरुले साइबर सेक्युरिटी अन्तरगत रहेर पावरपोइन्ट बनाइ प्रतिस्पर्धा गर्नुपर्ने उनको भनाइ छ ।
प्रतियोगितामा ३० भन्दा बढी समूह सहभागी हुने फोर्व्स कलेजका प्रिन्सिपल हरिसरण पाठकले जानकारी दिए । एउटा समूहमा एक जना छात्रासहित चार जना विद्यार्थी सहभागी हुन पाउने प्रतियोगितामा पहिलो हुने समूहले रु १५ हजार, दोस्रो हुने समूहले रु १० हजार एवं तेस्रो हुने समूहले रु पाँच हजार पुरस्कार पाउने उनले बताए ।
उनले विश्व बजारले खोजेको हस्पिटालिटी र आईटीको शिक्षा आफूहरुले प्रदान गरिरहेको बताए। प्रतियोगिताको बुधबार बिहान ११ बजे कलेज प्राङ्गणमा भरतपुर–२ का वडाध्यक्ष मनोज रानाभाटले उद्घाटन गर्ने कार्यक्रम रहेको पाठकको भनाइ छ । यसअघि कलेजले सञ्चालन गरेको पहिलो संस्करणको प्रतियोगितामा १० समूह र दोस्रो संस्करणको प्रतियोगितामा १५ वटा समूहले प्रतिस्पर्धा गरेका थिए ।
