चितवन, १ फागुन
राप्ती नगरपालिका प्रमुख शमशेर लामाले कार्यपालिका बैठक नबोलाएको भन्दै नगरपालिकाका अधिकांश जनप्रतिनिधिहरुले नगर प्रमुखको बिरोध गर्दै एकहप्ते अल्टिमेटम दिएका छन् । नगर प्रमुखको कार्यशैलीप्रति असहमति जनाउँदै आएका काङ्ग्रेस ,एमालेसहितका ६२ जना जनप्रतिनिधिले सात दिनको अल्टिमेटम दिएका हुन् ।
संविधान र कानुनअनुसार नगर प्रमुख नचलेको भन्दै नेपाली काङ्ग्रेस र नेकपा एमालेबाट निर्वाचित जनप्रतिनिधिले असन्तुष्टि जनाउँदै आएका छन् ।
कार्यपालिका बैठक एक महिनामा कम्तिमममा एकपटक बस्नुपर्ने भएपनि साउनदेखि यता एकपटकमात्र बसेको जनप्रतिनिधिहरुले बताएका छन् । आर्थिक वर्ष ०८०/८१ को बजेट प्रमुखले आफुखुसी तोक आदेश दिएर काम गरेको, कर्मचारी आवश्यकता भनेर बिज्ञापन खुलाए पनि हाल सम्म नियुक्ति नदिएको तर राजनीति आधारमा आफुखुसी कर्मचारी भने भर्ती गरेको जस्ता आरोप नगरपालिका भित्रका जनप्रतिनिधिहरुले लगाएका छन् ।
७ दिन भित्र कार्यपालिका बैठक बोलाएर नगर सभा नगरे नगरपालिकामा तालाबन्दी गर्ने जनप्रतिनिधिहरुले बताएका छन् । विरोध जनाउने नगरसभा सदस्यहरुमा काङ्रेस र एमालेका सबैजसो सदस्य रहेका छन् । राप्ती नगरपालिकामा अहिलेको गठबन्धनबाट नेकपा समाजवादीले प्रमुख र काङ्रेसले उपप्रमुखमा जितेको छ ।
