चितवन, २५ माघ ।
भरतपुरको बसेनीमा माघ २७ देखि हुने छैठौं गणेशबहादुर स्मृति जिल्ला स्तरीय अन्डर २१ नकआउट फुटबल प्रतियोगिताको खेल तालिका सार्वजनिक भएको छ ।
आयोजक नारायणी मोटर्स युनिक क्लबले आज (बिहीबार) तालिका सार्वजनिक गरेको हो । सार्वजनिक तालिका अनुसार फागुन ७ गतेसम्म चल्ने प्रतियोगितामा चितवन, नवलपुर र पर्साका गरि १५ टोली सहभागी हुने भएका छन् । सहभागी टोलीलाई चार समूहमा विभाजन गरिएको छ । जस अनुसार पोल ‘ए’ ‘बी’ र ‘सी’ मा चार-चार तथा ‘डी’ मा तीन टिम छन् ।
प्रतियोगिताको उद्घाटन खेलमा आयोजक नारायणी मोटर्स युनिक एफसी र भोजाड एफसी भिड्नेछन् । उक्त खेल दिउँसो १ बजे सुरु हुने कार्यक्रम संयोजक अमृत घलेले जानकारी दिए । सोही दिन दिउँसो ३ बजे भरतपुर २४ र यात्रा ग्रुप भिड्नेछन् ।
भरतपुर ११ कैलाशटोलस्थित क्लबको मैदानमा हुने प्रतियोगिताको विजेताले ट्रफीसहित एक लाख रुपैयाँ प्राप्त गर्नेछ । उपविजेताले ५० हजार रुपैयाँ प्राप्त गर्ने संयोजक घलेले बताए । प्रतियोगिताभरको सर्वोत्कृष्ट खेलाडीले ५ हजार तथा उत्कृष्ट गोलरक्षक, उत्कृष्ट डिफेन्स, स्ट्राईकर, सर्वाधिक गोलकर्ता र उदीयमान खेलाडीले जनही ३-३ हजार रुपैयाँ प्राप्त गर्नेछ । हरेक दिन म्यान अफ दि म्याचले २ हजार प्राप्त गर्ने उनले जानकारी दिए ।
प्रतियोगिताको तयारी अन्तिम चरणमा पुगेको क्लबका अध्यक्ष दीपक गुरुङले बताए । प्रतियोगितालाई यस पटक अघिल्ला संस्करण भन्दा व्यवस्थित गर्ने गरिने गुरुङको भनाइ छ । क्लबले हरेक वर्ष गणेशबहादुर स्मृति फुटबल आयोजना गर्दै आएको छ ।
