काठमाडौं माघ १८
सिरियालाई पेनाल्टी सुटआउटमा ५–३ ले हराउँदै इरान एएफसी एसियन कपको क्वार्टरफाइनलमा प्रवेश गरेको छ । बुधबार कतारको अब्दुल्लाह बिन खलिफा रंगशालामा निर्धारित र अतिरिक्त समय १–१ को बराबरीमा सकिएपछि नतिजाको निर्णय पेनाल्टीबाट भएको हो ।
पेनाल्टीमा इरानबाट प्रहारका निम्ति आएका पाँचै खेलाडीले गोल गरे । सिरियाबाट दोस्रो प्रहारका लागि आएका फहाद युसेफले गोल सकेनन् । इरानलबाट सबै खेलाडीले गोल गरेका कारण सिरियाले पाँचौँ पेनाल्टीको अवसर पनि नपाउँदा ५–३ ले पराजित भएको हो ।
त्यसअघि, खेलको ३४औँ मिनेटमा प्राप्त पेनाल्टीलाई सदुपयोग गर्दै मेहदी तारेमीले इरानलाई अग्रता दिलाएका थिए । ६४औँ मिनेटमा सिरियाले पनि पेनाल्टी पाएपछि ओमार ख्रिबिनले गोल गर्दै आफ्नो टिमलाई खेलमा फर्काएका थिए ।
इन्ज्युरी समयमा तारेमीले रातो कार्डको दर्शन गरेपछि इरान १० खेलाडीमा सीमित बनेको थियो ।
योसँगै प्रतियोगिताको क्वार्टरफाइनल समीकरण पूरा भएको छ । अब इरानले सेमिफाइनल प्रवेशका निम्ति प्रतियोगिताको सबैभन्दा सफल टिम जापानसँग खेल्नेछ ।
जापानले बुधबार राति नै भएको खेलमा बहराइनलाई ३–१ ले हराउँदै क्वार्टरफाइनल यात्रा तय गरेको थियो ।
क्वार्टरफाइनलमा साविक विजेता कतारले उज्वेकिस्तानसँग खेल्नेछ । अस्ट्रेलियाले दक्षिण कोरिया र जोर्डनले ताजिकिस्तानसँग खेल्नेछ ।
