– हिरालाल आचार्य ‘डायमण्ड’
चितवन, माघ ८ –
१८ वर्षको कलिलो उमेरबाटै घरपालुवा कुकुर बेचविखन गर्ने व्यावसाय सुरु गरेका भरतपुरका सुपल अधिकारीले दुई वर्षमै राम्रो सफलता हाँसिल गरेका छन् ।
भरतपुर १२ मुनाल चोक नजिक हिल्बर्ड चोकमा रोयल डग ब्रिडिङ्ग सेन्टर सञ्चालन गरी अधिकारीले सानो उमेरमै मनग्य आम्दनी गरिरहेका हुन् ।
उनले काठमाडौंबाट कुकुर र छाउराहरु ल्याएर बिक्रि वितरण गर्ने गर्दछन् । एउटा कुकुरको ५ हजारदेखि १ लाख ५० हजारसम्म पर्छ । स्पिच, पग, डोबर म्यान, जर्मन शेर्फड, ल्याब्बल्डर, गोल्डेन रिटिबर, दाल्मेसियम, पोमोरियन, हस्कि, सिजु, ग्रेट डेन, रोट वाइलर, डोगो अर्जेन्टिनो लगायतका विभिन्न जातका कुकुरहरु त्यहाँ पाइन्छन् । यसलाई चाहिने बेल्ट, भ्याक्सिन उपलब्ध गराउनुका साथै आवश्यक परामर्श पनि उनले दिने गरेका छन् ।
२ वर्षअघि व्यावसाय सुरु गरेका उनले अहिलेसम्म ३०० सयभन्दा बढी कुकुर चितवनका बासिन्दालाई बेचिसकेको जानकारी दिए । अधिकारीले घरमै २० वटा कुकुर राख्ने खोर बनाएका छन् । त्यही खोरमा गएर कुकुर हेरर किन्न सकिन्छ । कुकुर मन परेपछि उनले घरमै लगिदिने गर्दछन् ।
दाई सुरज अधिकारीले व्यावसाय सुरु गर्नका लागि लगानी गरिदिएको सुपल बताउँछन् । कुकुरको स्यारसुसाहर पनि उनी आफैले गर्ने गर्दछन् । उक्त व्यावसाय गर्नका लागि काममा खटिन उनी एकजना भए पुग्छ । अरुको सहयोग यसमा नचाहिएको अधिकारी बताउँछन् ।
उनी अहिले वीरेन्द्र बहुमुखी क्याम्पसमा व्यवस्थापन संकायमा स्नातक दोश्रो वर्षमा अध्ययनरत छन् । १८ वर्षको कलिलो उमेरबाटै व्यावसायमा होमिएका अधिकारी भन्छन्, ‘काम गर्ने इच्छा भयो भने उमेरले केही पनि छेक्दैन ।’
पढ्दै व्यावासयमा होमिएका सुपल अधिकारीले समाजमा एउटा राम्रो उदाहरण प्रस्तुत गरिहेका छन् ।