वाशिङ्टन, १९ पुस
अमेरिकाको एउटा अदालतमा एक पुरुषले महिला न्यायाधीशमाथि आक्रमण गरेका छन् । नाभेदाको क्लार्क काउन्टी डिस्ट्रिक्ट अदालतमा बुधवार न्यायाधीशले आरोपीलाई जेल सजाय सुनाउँदै गर्दा यो घटना भएको हो ।
प्रतिवादी डियओब्रा डेलोन रेडनले उफ्रिएर न्यायाधीश मेरी के होलथसमाथि हमला गरेको सेक्युरिटी फुटेजले देखाएको छ । अघिल्लो सुनवाईमा रेडनमाथि लगाइएका अभियोगहरुमा उनी दोषी भेटिएका थिए । उनीमाथि यसअघि लागेका अभियोग र उनको आपराधिक इतिहासका कारण आफूलाई रिहा गरिदिन रेडनले गरेको अनुरोध होलथसले अस्वीकार गरेको पनि फुटेजमा देखिएको छ ।
योलगत्तै रिसले चुर भएका रेडनले उफ्रिएर न्यायाधीशमाथि आक्रमण गरे । चार जना पुरुषले आक्रमण रोक्ने प्रयास गरेपनि प्रयास विफल भयो । रेडनले बारम्बार होलथसको मुखमा मुक्का हाने । होलथसलाई केही चोट लागेको बताइएको छ ।
चोट कति गहिरो छ भन्ने चाँहि थाहा भइसकेको छैन । उनी अहिले अस्पतालमा भर्ना छिन् । रेडनमाथि अब थप अभियोगहरू चलाइने भएको छ ।
