भरतपुर, १६ पुस
चितवनमा पुस १७ गते ११ औं पोल्ट्री दिवस मनाइने भएको छ । नेपाल कुखुरा व्यवसायी मञ्चको आयोजनामा विविध कार्यक्रम गरेर ११ औं
पोल्ट्री दिवस मनाइने भएको हो । कार्यक्रमलाई सभ्य र भव्य रुपमा सम्पन्न गर्नका लागि विभिन्न समितिहरु गठन गरिएको छ ।
‘कुखुराको अण्डा र मासुको परिकार, स्वस्थ जीवनको आधार’ भन्ने मुल नाराका साथ सप्ताहव्यापी रुपमा उक्त दिवस मनाउन लागिएको हो ।
नेपाल कुखुरा व्यवसायी मञ्चका सदस्य शिव पौडेलका अनुसार मंगलबार बिहान भरतपुर १० स्थित मञ्चको कार्यालयबाट बाजागाजा र प्ले कार्डसहित प्रभातफेरी गरिने छ। त्यसपछि भरतपुर महानगरपालिका वडा नंं. २ को सहकार्यमा क्षेत्रपुरको नमस्ते चोकमा बृहतखुला रक्तदानको कार्यक्रम गरिने र सोही स्थानमा एक दिने चिकेन एण्ड एग फुड फेस्टिबलको आयोजना गरिने छ ।
नेपाल कुखुरा व्यवसायी मञ्चले दिवसका सन्दर्भमा बुधबारदेखि नै विभिन्न कार्यक्रम सुरु गरेको छ । यो दिवसमा विशेष गरी विद्यालयमा अध्ययनरत विद्यार्थीहरुलाई अण्डा र कुखुराको मासुको महत्वबारेमा जानकारी गराइएको छ । विद्यार्थीलाई अण्डा र मासुको महत्वबारे चिकित्सकहरुले प्रशिक्षण दिँदै निःशुल्क रुपमा अण्डा बितरण समेत गरिएको छ ।
चितवन प्रवेश गर्ने ३ वटा नाकामा होर्डिङ बाेर्ड राखिने मञ्चका महासचिव ज्ञानबहादुर विसुरालले जानकारी दिए । पोल्ट्री दिवसलाई पोल्ट्री व्यवसायीको चाडका रुपमा मनाउनु पर्छ भन्ने मान्यताअनुसार हरेक बर्ष विभिन्न कार्यक्रम गरेर मनाउन थालिएको उनले बताए ।