चितवन, बैशाख २८ –
भरतपुरको चौबिसकोठीमा रहेको मौलाकालिका अस्पतालका चिकित्सकको लापरबाहीले गर्दा एक बिरामीको मृत्यु भएको छ ।
माडी नगरपालिका ५ का रामप्रसाद तिवारीको खुट्टामा राखिएको रड निकाल्ने क्रममो डक्टरको लापरबाहीले गर्दा हिजो मंगलबार मृत्यु भएको हो । ५२ वर्षीय तिवारी बघौडा मध्यवर्ती उपभोक्ता समितिको अध्यक्ष समेत हुन् ।
परिवारका अनुसार गत चैत ११ गते स्थानीय सोमेश्वर मध्यवर्ती सामुदायिक वनमा आगलागी हुँदा निभाउने क्रममा उनी रूखको जरामा अल्झिएर लड्दा खुट्टा भाँचिएको थियो । माडीको बघौडा अस्पतालमा सामान्य उपचारपछि भरतपुरको मौलाकालिका अस्पताल ल्याइएका तिवारीको खुट्टामा मौलाकालिका अस्पतालले रड राखेर पठायो ।
त्यसको ४५ दिनपछि रड झिक्न आएकोमा अस्पतालको लापरबाहीले गर्दा तिवारीले ज्यानै गुमाउनु परेको हो । उपचारमा लापरबाही गरेर मृत्यु भइसकेपछि कुरुवालाई थाहै नदिई बिरामीलाई मौलाकालिकाबाट भरतपुर अस्पताल पु¥याएको भन्दै आफन्तले हिजो प्रदर्शन समेत गरेका थिए ।
अस्पताल प्रशासनले पनि उपचारमा संलग्न चिकित्सक र स्वास्थ्यकर्मीको लापरबाही भएको स्वीकार गरेको छ । अस्पतालले उपचारमा संलग्नहरुलाई प्रचलित कानुनअनुसार कारबाही गर्ने र आफन्तलाई क्षतिपूर्ति दिने भन्दै परिवारसँग सहमति समेत भएको छ ।
सहमति पत्रमा बिरामीको मृत्युपछि परिस्थिति खराब हुन्छ भनेर परिवारसँग सल्लाह नै नगरी सरकारी अस्पताल लैजानु आफ्नो कमजोरी भएको अस्पतालले बताएको छ । अस्पतालका प्रबन्ध निर्देशक डाक्टर केशवराज भुर्तेल, चिकित्सकहरु र मृतकका परिवारले हस्ताक्षर गरेको सहमति पत्रमा बायाँ खुट्टा भाँचिएर लगाएको स्टिल निकाल्नको लागि उपचारको क्रममा आएका तिवारीलाई अपरेशन कक्षमा लठ्याउने क्रममा अस्पतालबाट अपनाउनुपर्ने सबै सुरक्षाका उपायहरु नअपनाएका कारण बिरामीको मृत्यु भएको भनिएको छ ।