चितवन । होटल व्यवसायी संघ चितवनको आयोजनामा भोलिदेखि सुरु हुन लागेको रैथाने फुड फेस्टिबल एवम् वृहत सांस्कृतिक कार्यक्रमको तयारी पुरा भएको छ । भरतपुर महानगरपालिकाका उपमेयर चित्रसेन अधिकारीले भोलि दिउँसो ३ बजे फुडफेस्टिबलको उद्घाटन गर्ने कार्यक्रम छ ।
फुड फेस्टिबलका लागि तयार गरिएका ३९ वटै स्टल बुकिङ भइसकेको होटल व्यवसायी संघ चितवनका सचिव कृष्ण महतोले जानकारी दिए । फुड फेस्टिबलको उद्घाटनको दिन भोलि प्रिती आले, पशुपती शर्मा र सागर लम्साल ‘बले’ लगायतका कलाकारहरुले प्रस्तुती दिने महतोले बताए ।
पुस १५ गते स्वप्न सुमन र १६ गते द स्याडोजको प्रस्तुती रहनेछ । यी दुई दिन अवलोकनकर्ताको लागि ३०० रुपैयाँको टिकटको व्यवस्था गरिएको उनले बताए । अन्य दिनहरुमा भने निःशुल्क प्रवेशको व्यवस्था मिलाइएको छ । पुस १७ गते सुवोध गौतम(एकदुमे), तारा थापा, प्रजापति पराजुली र १८ गते अनु चौधरी, कर्णराज गिरी, ढाकाराम पौडेल, भुवन प्यासी, बाल कलाकार सुप्रिम मल्ल लगायत आउने उनले बताए ।
फेस्टिवल अवधिभर ५० हजार जनाले अवलोकन गर्ने अनुमान गरिएको होटल व्यवसायी संघका अध्यक्ष लोकनाथ भट्ट (कृष्ण)ले बताए । त्यस्तै, पाँच दिनमा करिब पाँच करोड भन्दा माथीको कारोबार हुने अपेक्षा गरिएको छ । फुड फेस्टिबल परिसरभित्रै खानेपानी तथा शौचालयको उचित प्रबन्ध गरिनुको साथै फ्रि वाइफाई र निःशुल्क पार्किङको समेत व्यवस्था गरिएको आयोजकले जनाएको छ ।