रत्ननगर, कार्तिक १५
पूर्वी चितवनको सौराहामा केपी ओली कप राष्ट्रिय भलिबल प्रतियोगिता हुने भएको छ ।
राष्ट्रिय युवा संघ नेपाल रत्ननगर नगर कमिटीको आयोजनामा कार्तिक १८ गतेदेखी २१ गतेसम्म वडा नम्बर ७ को सिसुवार मैदानका प्रतियोगिता आयोजना गर्न लागिएको बुधबार पत्रकार सम्मेलनको आयोजना गरि जानकारी दिइएको हो ।
खेलको माध्यमबाट सौराहाको पर्यटनको विकास गर्ने उद्देश्यले प्रतियोगिता आयोजना गर्न लागिएको युवा संघ नगर कमिटी अध्यक्ष सन्देश पन्तले जानकारी दिए । प्रतियोगितामा सात प्रदेशको ७ टिम र २ विभागीय टिमको सहभागिता रहने पन्तले बताए । प्रतियोगितामा प्रथम हुने टोलीलाई दुई लाख, दोस्रो हुने टोलीलाई एक लाख, तेस्रो हुने टोलीलाई ५० हजार रुपैयाँ र विभिन्न विधामा ४० हजार रुपैयाँ पुरस्कार प्रदान गरिने एमाले रत्ननगर नगर कमिटी उप सचिव सागर मिश्रले जानकारी दिए ।
देशभरबाट १६० भन्दा बढी खेलाडीको उपस्थिती रहने प्रतियोगितामा १८ लाख भन्दा बढी खर्च हुने र प्रतियोगिताको सम्पूर्ण तयारी पुरा भएको एमाले रत्ननगरका सह इन्चार्ज केशब आचार्यले जानकारी दिए । पत्रकार सम्मेलनमा युवा संघ चितवन जिल्ला अध्यक्ष झलकराज भट्ट, युवा संघ जिल्ला तथा नगरका नेताहरूको उपस्थिती रहेको थियो ।