भरतपुर, २४ वैशाख –
राष्ट्रिय प्रजातन्त्र पार्टीका उपाध्यक्ष विक्रम पाण्डेले माडीलाई मणि बनाउन सपना बाँडेर माडीबासीलाई धोका दिएको आरोप लगाउनुभएको छ । राप्रपाको चुनावी घरदैलो अभियानलाई माडी बरुवामा सम्बोधन गर्दै उहाँले विकासका परिकल्पनाहरुको घाँटी निमोठोर जनतालाई धोका दिने काम भएको बताउनुभयो ।
पाण्डे २०७० सालमा माडी सहितको चितवन क्षेत्र नम्बर ५ बाट निर्वाचित भएर संविधानसभा सदस्य र मन्त्री बन्नुभएको थियो । “मेरो कार्यकालमा मैले माडीको विकासको परिकल्पना गरेको थिएँ, अहिले ती योजनाहरुको घाँटी निमोठ्ने काम भएका छन्, म ज्यादै दुखी छु”, उहाँले भन्नुभयो, “ठसला भाषण, मणी र आकाशे पुलका सपना बाँडेर जनतालाई धोका दिने काम गरका छन् ।” उहाँले गोविन्दवस्तीदेखि बनकट्टासम्म निकुञ्ज तथा रिउ किनारमा फोर लेन सडक सहितको तटबन्धनको गुरुयोजनानै अलपत्र पारेको दुखेसो गर्नुभयो ।
जंगली जनावरलाई मानववस्ती जान रोक्न रिउ कोरिडोरमा तटबन्धन सहितको सडक बनाउन पछिल्ला सरकार अनुदार बनेको बताउनुभयो । माडी चक्रपथको योजना पनि पुरा गर्न नगरपालिकाले वेवास्ता गरेको बताउनुभयो । “चक्रपथको काम भैरवपुरसम्म पु¥याएका थियौँ, अहिले लथालिंग बन्यो, चक्रपथनै विलाउने अवस्थामा पुग्यो”, उहाँले भन्नुभयो, “माडीलाई इको नगरका रुपमा इलेक्ट्रिक बसहरु चलाउने योजनापनि हराए ।”
उहाँले विदेशीको इशारामा नेताहरु लाग्दा माडीले विकासको फड्को मार्न नसकेको बताउनुभयो । “नेताहरुको अवस्था परिवर्तन गर्न व्यवस्था बदलियो, तर जनताको अवस्था बदलिएन, जनताको अवस्था दयनीय बन्यो”, उहाँले भन्नुभयो, “व्यवस्था जनताका लागि हुनुपर्छ, जनता समस्याहरु समाधान गर्न जनप्रतिनिधि प्रतिवद्ध बन्नुपर्छ ।” माडीलाई अर्गानिक कृषि उत्पादनको मुख्य थलो बनाउन पहल हुनुपर्ने बताउनुभयो । किसानलाई उत्पादन बढाउन आवश्यक योजनाहरु बनाएर विश्वभरीनै मेड इन माडीको अवधारणा कार्यान्वयन गर्न अबका जनप्रतिनिधि लाग्नुपर्ने बताउनुभयो ।
माडीमा राप्रपा र एमालेबीच मेयर र उपमेयरमा तालमेल भएको छ । एमालेबाट ताराकुमारी काजी महतो, राप्रपाबाट मदनप्रसाद पौडेल उपमेयरको उम्मेदवार हुनुहुन्छ । वडातहमा एमाले र राप्रपाबीच मित्रवत प्रतिस्पर्धा हुनेछ । राप्रपाका तर्फबाट वडा नम्बर १ मा अमित लामा, २ मा अर्विन गुरुङ, ३ मा भीमबहादुर कुँवर, ४ मा कृष्णबहादुर घर्ती, ५ मा टिकाराम भट्टराई, ६ मा गंगा गुरुङ, ७ रामकृष्ण क्षेत्री, ८ मा वीरेन्द्रबहादुर भण्डारी, ९ मा कुलबहादुर दुरा वडाध्यक्षको उम्मेदवार हुनुहुन्छ । पूर्वमन्त्री राप्रपाका उम्मेदवारलाई जिताउन आज दिनभर माडीका ९ वटै वडाका चुनावी घरदैलोमा सहभागि हुदैहुनुहुन्छ ।
