रत्ननगर, कार्तिक २ ।
वन्यजन्तुबाट भएको बाली नाली क्षतिको राहतस्वरुप क्षतिपूर्ति रकम वितरण गरिएको छ ।
सौराहाको निकटमा रहेको बाघमारा मध्यवर्ती सामुदायिक वनले सेवा क्षेत्र भित्रका ६० घरधुरी किसानलाई क्षतिपूर्ति बापतको रु १ लाख ३९ हजार रुपैँया रकम बिहीवार प्रदान गरेको हो । धान बालीमा क्षति पुगेका किसानहरुले प्रति कठ्ठा रु २ हजार रुपैँयाका दरले क्षतिपूर्ति रकम पाएका हुन् ।
यस्तै, १३ सय ७७ घरधुरीको पशुधन विमा गरिएकोमा सोही अवसरमा ५ जना कृषकहरुले मृत्यु भएका पशुहरुको विमा रकम पाएकाछन् । मानव वन्यजन्तु द्वन्द्व न्यूनीकरण कार्यक्रम अन्तर्गत सो सामुदायिक वनले हरेक वर्ष उपभोक्ता किसानहरुलाई बालीनाली क्षतिको पूर्ण राहत दिँदै आएको छ ।
कार्यालयमा आयोजित कार्यक्रमका प्रमुख अतिथि चितवन राष्ट्रिय निकुञ्ज सौराहाका सेक्टर प्रमुख सन्त वहादुर मगर र बालीनाली वितरण उप समितिका संयोजक विर वहादुर लामाले किसानहरुलाई क्षतिपूर्ति रकम हस्तान्तरण गरेका थिए ।
सो अवसरमा प्रमुख अतिथि मगरले जंगली जनावरहरुले बाली नालीमा क्षति पुर्याएका किसानहरुलाई राहत स्वरुप रकम वितरण गरिएको बताए । सामुदायिक वनले बाली बीमा संगै घरपालुवा जनावरको समेत बीमा गरेर किसानलाई राहत प्रदान गरेकोमा धन्यवाद ज्ञापन गरे । चितवन राष्ट्रिय निकुञ्जले २०६९ सालबाट राहत दिने नियम बनाएसंगै पीडित किसानलाई राहत पुगेको बताए ।
वनका अध्यक्ष जीतु तामाङले मानव वन्यजन्तु बीचको द्वन्द्व न्यूनीकरण गर्दै उपभोक्ताहरुलाई वन संरक्षणमा जिम्मेवार बनाउन वालीनालीको पूर्ण क्षतिपूर्ति रकम उपलब्ध गराउने गरिएको बताए । किसानहरुलाई धान, मकै र तोरी गरी तीन बालीको क्षतिपूर्ती रकम उपलब्ध गराउदै आईरहेको उनको भनाई छ ।
उनले भने, ‘राहतस्वरुप क्षतिपूर्ति रकमलाई हामी अझ प्रभावकारी बनाउँदै लैजानेछौँ, अहिलेसम्म १३ सय ७७ घरधुरीको पशुधन विमा गरेका छौ ।’
शिखर ईन्चुरेन्ससंग सम्झौंता गरि गाई, भैंसी, बाख्रा, भेडा लगाएत अन्य पशु चौपायहरुको विमा गरिएको वनका अध्यक्ष तामाङले बताए ।
पर्यापर्यटन मार्फत आम्दानी गर्दै आएको बाघमाराले उपभोक्ताको गरिबी निवारणलाई प्राथमिकता दिएर काम गरिरहेको छ । वन संरक्षण र सामुदायिक विकासको अलवा सो वनले सीपमुलक कार्यक्रम मार्फत जीविकोपार्जनका कार्यक्रम गर्दै आएको छ ।
वन र बस्तीको सिमानामा पर्खाल निर्माण, उपभोक्ताको जीवन बीमा, बालीनाली क्षति राहत तथा विभिन्न आयआर्जनका कार्यक्रम गर्दै आएको उनले बताए ।
