चितवन, २६ भदौ
गत साउन ३१ गते टिकौली जंगलमा भएको दुर्घटनामा मुख्य जिम्मेवार भनिएको अक्सफोर्ड कलेजको बसका चालक र सहचालक विरुद्द सरकारी वकिलको कार्यालयले चितवन अदालतमा अभियोग दाबीसहित मुद्दा पेस गरेको छ । तीन वर्षदेखि १० वर्षसम्म कैद र ३० हजारसम्म जरिवाना माग गरी अभियोगपत्र दर्ता गरिएको हो ।
अदालतका श्रेष्तेदार विष्णु आचार्यका अनुसार सोमबार भएको चितवन अदालतको आदेशअनुसार सहचालक भनिएका भरत परियार (आशिष) लाई पुर्पक्षका लागि थुनामा पठाइएको छ । आशिषसँग बस चलाउनका लागि लाइसेन्स नभएको र गाँजासमेत सेवन गरेको रिपोर्ट आएको थियो। उनिसँग ट्रयाक्टर चलाउन पाइने लाइसेन्स मात्र भएको प्रहरीले जनाएको छ। उनीविरूद्ध यातायात व्यवस्था ऐनअनुसार मुद्दा चलाइएको छ । चितवन प्रहरी प्रवक्ता डीएसपी विजयराज पण्डितले दिएको जानकारी अनुसार तत्कालिन समयमा वास्तविक चालक बसको अन्तिम सिटमा बसेको र सहचालकले बस चलाएको प्रारम्भिक अनुसन्धानबाट खुलेको हो । वास्तविक चालक भने फरार रहेको उनले बताए । बसका वास्तविक चालक भनिएका कविन सापकोटा विरुद्द पनि मुद्दा दर्ता भएको छ।
प्रहरीले दुवैजनालाई सवारी अंगभंगअन्तर्गत मुद्दा चलाएको छ । यातायात व्यवस्था ऐन, २०४९ को दफा १६२ को उपदफा १ र २ को अभियोग आशिषमाथि छ भने उपदफा ३ को अभियोग सापकोटामाथि छ । बदनियतका साथ सवारी चलाएको र सवारी चलाउने अनुमतिपत्र नभई सवारी चलाएको अभियोग आशिषमाथि छ । त्यस्तै, कविनलाई लगाइएको दफा ३ को अभियोगअनुसार सवारीको जिम्मा लिएको चालकले सवारी चलाउने अनुमतिपत्र नभएको मानिसलाई चलाउन दिएको आरोप छ । यसअनुसार वास्तविक चालक वा सवारी दिनेलाई मुख्य कसुरदारलाई हुने सजायको आधा सजाय हुने कानुनी व्यवस्था छ ।
गत साउन ३१ गते दिउँसो पूर्व पश्चिम सडकको टिकौली जंगलमा एउटा अक्सफोर्डको कलेज बसले शव बोकेको बलेरो र ६ वटा मोटरसाइकललाई ठक्कर दिएको थियो । भरतपुरबाट टाँडी तर्फ जाँदै गरेको ना १ क ६१३१ नम्बरको गैंडाकोटको अक्सफोड कलेजको बसले विपरीत दिशाबाट आउँदै गरेको ना २ च ८४४६ नम्बरको शव बोकेर देवघाटतर्फ जाँदै गरेको बलेरोलाई ठक्कर दिएको थियो । साथै अन्य ६ वटा दुइपाग्रे सवारीलाई पनि ठक्कर दिएको थियो ।
दुर्घटनाका घाइतेहरु सबै अस्पतालबाट डिस्चार्ज भइसकेको प्रहरीले जनाएको छ ।
