मुम्बई– उत्तरी अफ्रिकी देश मोरक्कोमा शुक्रबार गएको भूकम्पमा परी मृत्यु हुनेको सङ्ख्या दुई हजारभन्दा बढी पुगेको छ । भारतका प्रधानमन्त्री नरेन्द्र मोदीले शनिबार बिहान आएको भूकम्पमा परी मृत्यु भएकाहरूप्रति गहिरो दुःख व्यक्त गरेका थिए ।
प्रधानमन्त्री मोदीले सामाजिक सञ्जालमा लेखेका छन्, ‘भारत यो कठिन घडीमा मोरक्कोलाई हरसम्भव मद्दत गर्नका लागि तत्पर छ ।’ चलचित्र उद्योगसँग सम्बद्ध डान्सर, मोडल तथा अभिनेत्री नोरा फतेहीले सहयोगको प्रस्तावका लागि मोदीलाई धन्यवाद दिएकी छिन् ।
नोराले आफ्नो इन्स्टाग्राम अकाउन्टमा लेखेकी छिन्, ‘यति ठुलो सहयोगको लागि प्रधानमन्त्री नरेन्द्र मोदीलाई धन्यवाद ! यस बारे चेतना जगाउने र सहयोगी हात बढाउने सुरुवाती देशमध्ये तपाईं एक हुनुहुन्थ्यो । यसका लागि मोरक्को जनता धेरै आभारी र कृतज्ञ छन् । जय हिन्द ।’
मोदीले ट्विट गर्नुअघि नोरा फतेहीले शनिबार इन्स्टाग्राममा लेखेकी थिइन्, ‘आज मोरक्कोमा भूकम्पको खबर हृदय विदारक छ ! धेरै सहरमा यसको नराम्रो असर परेको र धेरैको ज्यान गएको जानकारी पाइरहेको छु । म अहिले सबैका लागि दुःखी छु ।’
उनले सबैको सुरक्षाको लागि प्रार्थना गरिरहेको लेखेकी थिइन् । उनले लेखेकी थिइन्, ‘यो निकै डरलाग्दो छ । म ईश्वरलाई धन्यवाद दिन्छु कि हाम्रा मित्र र परिवारका सदस्य सुरक्षित छन् । जसले यो विपतमा आफ्नो प्रियजन गुमाएका छन्, उनीहरुप्रति मेरो समवेदना ।’
नोरा फतेही मोरक्को मूलकी क्यानेडेली नागरिक हुन् । उनी हाल आफ्नो कामका लागि भारतमा छिन् । उनले थुप्रै फिल्म र गीतमा काम गरिसकेकी छिन् ।
