– हिरालाल आचार्य ‘डायमण्ड’
चितवन, भदौ २३
धरानमा भएको गौवंश हत्याको विरोधमा नेपाल सन्त समाजको आह्वान तथा चितवन, नवलपुर, तनहुँ लगायतका जिल्लाका ॐ कार परिवारको सक्रियतामा नारायणगढस्थित नारायणी नदी किनारमा धर्म सभा एवम् जनप्रदर्शन भएको छ ।
आज शनिबार भएको विरोध पदर्शनमा धरानमा भएको गौ हत्याको विरोध गरिएको थियो । सभामा उपस्थित भएकाहरुले संविधानको पालना गर गौ हत्यारालाई कारवाही गर, ओमकार परिवार एक हौं संस्कार र संस्कृति जोगाउँ विधर्मलाई भगाउँ, धर्म निरपेक्षता चाहिँदैन, गौ हत्या गर्न पाईँदैन, हाम्रो धर्म संस्कार प्राणभन्दा प्यारो छ, मठमन्दि जोगाउ विधर्मलाई भगाउ, हिन्दु धर्मको विशेषता अनेकतामा एकता लगायतका नारा लेखिएका प्लेकार्ड बोकेका थिए ।
सभालाई नेपाल सन्त समाजका केन्द्रीय अध्यक्ष स्वामी ज्ञानानन्द सरस्वती, महामण्डलेश्वर स्वामी आत्मानन्द गिरि, स्वामी रमणान्द गिरि, भरतपुरको लंकुस्थित लक्ष्मीवैकुण्ठनाथ मन्दिरका पीठाधीश स्वामी जगन्नाथाचार्य, निम्बार्क दर्शन केन्द्र गैंडाकोटका अध्यक्ष आचार्य हरिशरण उपाध्याय, जनजाति कल्याण आश्रमका राष्ट्रिय संगठन सचिव प्रेम थुलुङ्ग, केन्द्रीय सदस्य लालबहादुर चौधरी, बौद्ध धर्मका बौद्धिक व्यक्तित्व मोहन लामा लगायतले सम्बोधन गर्दै गौ हत्याको विरोध जनाएका थिए ।
सभा हुनुपूर्व चौबिसकोठी, पोखरा बसपार्क, धर्मचोक र भृकुटी चोक, गैंडाकोटबाट ॐ कार एवम् राष्ट्रिय झण्डा, प्लेकार्ड सहितको विशाल ¥याली निकालिएको थियो ।
आयातीत धर्मको आडमा गाइलाई अस्त्रको रुपमा देशका विभिन्न ठाउँमा प्रयोग गर्दै सनातनीमाथि प्रहार गरी मिलेर रहेका सबै नेपाली समुदायबिच विखण्डन ल्याउने प्रपञ्च रचिएको सभामा बोल्ने वक्ताहरुले बताएका छन् । कानुनमा गौहत्यालाई अपराध माने पनि सरकारद्वारा हत्यामा संलग्नलाई कारबाही नगर्नुले सरकार नै हिन्दुधर्मको विरोधमा उत्रेको वक्ताहरुको भनाइ थियो ।
नेपालको राष्ट्रिय जनावर गाइको रक्षा एवम् बहुसंख्यक जनताको भावनाको कदर गर्दै गौवंश हत्यामा संलग्नलाई कारबाहीमा ल्याउन माग गर्दै सभा समापन गरिएको थियो ।
