चितवन, २२ भदौ
जिल्लामा पहिलोपटक तीज विशेष उद्यमशीलता मेला सुरु भएको छ । मेलाको उद्घाटन समारोहमा बागमती प्रदेशका स्वास्थ्यमन्त्री उत्तम जोशीले महिलाले सञ्चालन गरेको उद्योग तथा व्यवसायलाई राज्यले थप सहयोग तथा प्रोत्साहन गर्नुपर्ने बताउनुभयो ।
उहाँले केही मात्रामा सहयोग गरेको भए पनि अझ विस्तृतरूपमा सबै पक्षलाई समेटेर प्रोत्साहन गर्नुपर्ने धारणा राख्नुभयो । महिला उद्यमीतर्फ इङ्गित गर्दै उहाँले भन्नुभयो “तपाईंहरूले आफ्नै माटोमा पसिना बगाउनु भएको छ । देशका लागि केही गर्न सकुँ भनेर दिनरात खट्नुभएको छ । तपाईंहरू सबैजना धन्यवादको पात्र हुनुहुन्छ ।” उहाँले महिलाले गरेको व्यवसायको संरक्षण गर्न जरुरी रहेको भन्दै यस्ता खालका मेलाले व्यवसायमा थप टेवा पुग्ने बताउनुभयो ।
कार्यक्रममा नेपाल घरेलु तथा साना उद्योग महासङ्घका अध्यक्ष उमेशप्रसाद सिंहले तीज विशेष मेलाले चाडबाडलाई उद्यमशीलतासँग जोडेको बताउनुभयो । उहाँले महिलाले उत्पादन गरेका सामानको प्रवर्द्धन लागि आफूहरूको सहयोग रहने भन्दै महिला उद्यमीका उत्पादित सामानको डिजिटल प्रवर्द्धन महासङ्घले गरिदिने आश्वासन दिनुभयो ।
कार्यक्रमका नेपाल उद्योग परिसङ्घ बागमती प्रदेशका अध्यक्ष भेषराज दुवाडीले धर्म र संस्कृतिको जगेर्ना गर्दै उद्यम गर्ने महिलाले आयोजना गरेको यस प्रकारको मेलाले चाडबाड मनाउने तरिका परिवर्तन भएको बताउनुभयो । यस्ता मेलाको आयोजनाले समाजमा राम्रो सन्देश जाने उहाँको भनाइ थियो । उद्यमशीलताको प्रदर्शनसँगै चाडबाड मनाउने यस प्रकारको तरिका उद्यमी महिलाका लागि अवसर भएको उहाँले बताउनुभयो ।
प्रमुख जिल्ला अधिकारी भुपेन्द्र थापाले उद्यमी महिलाहरूले आयोजना गरेकोे यस खालको मेलाले तीज मनाउने भड्किलो तरिका हट्ने आशा व्यक्त गर्नुभयो । काम र चाडबाडसँगै हुनेहुँदा धर्म संस्कृतिको रक्षा र उद्यमशीलताको प्रवर्द्धन पनि सँगै हुने उहाँको भनाइ थियो । स्वदेशी उत्पादनको प्रयोग गर्दा अनावश्यक खर्च समेत कम हुने भन्दै सबैलाई सभ्य तरिकाले चाडबाड बनाउन उहाँले आग्रह गर्नुभयो ।
चितवन उद्योग सङ्घको प्रदर्शनी स्थलमा लागेको मेलामाा स्वदेशमा उत्पादन भएका र तीज पर्वसँग सम्बन्धित सामग्रीहरूको स्टल राखिएका छन् । मेलामा हस्तकलाका सामग्री, तीज विशेष सामग्री, स्वदेशी लत्ता कपडा, बुटिकका सामग्री, सजावटका गरगहना र खाद्यान्नका परिकारलगायतका स्टल रहेका छन् । तीन दिन चल्ने मेलामा १० हजार दर्शकले अवलोकन गर्ने र रु ५० लाखको कारोबार हुने आयोजकको अनुमान छ ।
चितवन उद्योग सङ्घ महिला उद्यमी मञ्चको परिकल्पनामा चितवन उद्योग सङ्घ युवा उद्योमी मञ्च र महिला सृजनशील केन्द्रको संयुक्त आयोजनामा मेला सञ्चालन भएको हो । महिला उद्यमीहरूको उत्पादनलाई प्रवर्द्धन गर्न र बजारमा पहुँच पु¥याउँदै पर्वलाई उद्यमसँग जोड्नका लागि मेला आयोजना गरिएको आयोजकको भनाइ छ ।
