भरतपुर, २२ भदौ-
माधव सापकोटा
नेपाल सन्त समाजको आह्वान तथा चितवन, नवलपुर, तनहुँलगायतका जिल्लाका ॐकार परिवारको सक्रियतामा भोलि भदौ २३ गते शनिवार हुने धर्मसभाको अन्तिम तयारी पूरा भएको सभा आयोजक समितिले जनाएको छ ।
दिउँसो १२ बजे नारायणी नदी किनार नारायणघाटमा हुने धर्मसभालाई नेपाल सन्त समाजका केन्द्रीय अध्यक्ष स्वामी ज्ञानानन्द सरस्वती, महामण्डलेश्वर स्वामी आत्मानन्द गिरि,स्वामी रमणान्द गिरि, मोहन शरण देवाचार्य, लंकुस्थित लक्ष्मीवैकुण्ठनाथ मन्दिरका पीठाधीश स्वामी जगन्नाथाचार्य, निम्बार्क दर्शन केन्द्र गैंडाकोटका अध्यक्ष आचार्य हरिशरण उपाध्याय, जनजाति कल्याण आश्रमका राष्ट्रिय संगठन सचिव प्रेम थुलुङ्ग, केन्द्रीय सदस्य लालबहादुर चौधरी, बौद्ध धर्मका बौद्धिक व्यक्तित्व मोहन लामालगायतले सम्बोधन गर्ने संयोजक टंकनाथ पौडेलले जानकारी दिनुभयो।
यस कार्यक्रमको प्रमुख उद्देश्य धरानलगायत देशका विभिन्न ठाउँमा भइरहेको गोवंश हत्याको विरोध गर्दै वैदिक सनातन हिन्दुराष्ट्र घोषणा गराउन दबाब सिर्जना गर्नु रहेको प्रचार प्रमुख प्रेमनिधि भारद्वाजले बताउनुभयो ।
सभा हुनुपूर्व साधु- सन्तमहात्माहरूको नेतृत्वमा ११:३० बजेदेखि चौबिसकोठी , पोखरा बसपार्क , धर्मचोक र भृकुटी चोक ,गैंडाकोटसहित ४ ठाउँबाट ॐकार एवम् राष्ट्रिय झन्डा, प्लेकार्ड सहितको विशाल र्याली निक्लने र पुलचोकमा जम्मा भएर नारायणी किनारमा धर्मसभामा परिणत हुने तथा चौबिसकोठी नाकाकाे नेतृत्व नेपाल सन्त समाजका केन्द्रीय अध्यक्ष स्वामी ज्ञानानन्द सरस्वती ,पोखरा बसपार्क नाकाको नेतृत्व महामण्डलेश्वर आत्मानन्द गिरि, गैँडाकोट नाकाको नेतृत्व स्वामी रमणानन्द गिरि र धर्मचोक नाकाको नेतृत्व स्वामी जगन्नाथाचार्यले गर्ने त्रिपुरेश्वर शिवालय शरद्पुरमा स्वयंसेवकहरूलाई प्रशिक्षणका क्रममा सन्त समाजका अध्यक्ष स्वामी ज्ञानानन्द सरस्वतीले बताउनुभयो।
“अहिंसा परमो धर्म:´ भन्ने ॐकार परिवारजस्तो सनातनी परम्परालाई खलल पुर्याउन आयातीत धर्मको आडमा गाईलाई अस्त्रको रूपमा देशका विभिन्न ठाउँमा प्रयोग गर्दै सनातनीमाथि प्रहार गरी मिलेर रहेका सबै नेपाली समुदायबीच विखण्डन ल्याउने प्रपञ्च गरिएको, कानुनमा गोहत्यालाई अपराध माने पनि सरकारद्वारा हत्यामा संलग्नलाई कारबाही नगरेको र यस्ता घटना बारम्बार भइरहेकाले सभा गर्न बाध्य हुन पुगेको आयोजक समितिले प्रष्ट पारेको छ ।
