काठमाडौं भदौ ६
जुलाइयता प्रकोपको रूपमा फैलिइरहेको आँखा पाक्ने संक्रमण भाइरल कन्जन्टीभाइटीस् काठमाडौं उपत्यकामा अझै नियन्त्रणमा आउन सकेको छैन ।
प्रमुख आँखा अस्पतालहरूमा संक्रमितको संख्या केही कम भएपनि पूर्णरूपमा भने अझै नघटेको तथ्यांकले देखाएको छ ।
तिलगंगा आँखा प्रतिष्ठानमा पछिल्लो साता दैनिक सरदर १५० जना कन्जन्टीभाइटीस् संक्रमित आइरहेको तथ्यांक छ । प्रतिष्ठानमा अघिल्लो साता अगष्ट ११ देखि १५ सम्म पाँचदिनमा ८३० जना संक्रमित बिरामी थपिएका थिए ।
कीर्तिपुर आँखा अस्पतालको ओपीडीमा दैनिक आउनेमध्ये ३० देखि ३५ प्रतिशतमा भाइरल कन्जन्टीभाइटीस् देखिइरहेको छ ।
संक्रमण केही मत्थर भएजस्तो देखिए पनि उल्लेखनीय रूपमा नघटेको अस्पतालका मेडिकल डाइरेक्टर डा. एरिक वैद्य बताउँछन् ।
यो दर अघिल्लो साता ५० प्रतिशतभन्दा माथि थियो । तर, अहिले पनि विद्यालय उमेरका बालबालिका, युवा तथा एकै परिवारका धेरैजना सदस्य संक्रमित भएका केसहरू देखिइरहेको डा. वैद्यले बताए ।
बिरामीले कति दिनसम्म सार्छ अरुलाई संक्रमण ?
अहिले देखिएको भाइरल कन्जन्टीभाइटीस् बर्खायाममा मात्रै नभइ सबै सिजनमा देखिने गरेको चिकित्सकहरू बताउँछन् । प्रकोपकै रूपमा भने सन् २००३ यता योवर्ष मात्रै देखिएको हो ।
डा. वैद्यका अनुसार सामान्यत: भाइरल कन्जन्टीभाइटीस् संक्रमितबाट पाँचदिनसम्म अरुलाई सर्ने जोखिम रहन्छ । औषधि सुरु गरेको भएपनि पाँचदिनसम्म संक्रमितबाट अरुमा सर्ने सम्भावना रहने उनको भनाइ छ ।
यदि संक्रमण आँखाको नानीसम्म नपुगेको भए सातदिनसम्ममा निको हुने बाल आँखारोग विशेषज्ञ डा. सविना श्रेष्ठ बताउँछिन् । तर, लक्षण हराए पनि दुई सातासम्म नियमित औषधि प्रयोग गर्नुपर्ने उनको भनाइ छ । कन्जन्टीभाइटीस्को शंका लागेमा जथाभावी औषधि नलगाइ विशेषज्ञकहाँ पुग्न उनको सुझाव छ ।
