चितवन, साउन २९
चितवनका तीन वटा सामाजिक संस्थाहरुले गैंडाकोटका एक विद्यालयमा अध्ययनरत बालबालिकाहरुको निःशुल्क रक्त समूह परीक्षण गरेको छ ।
नारायणगढ लायन्स क्लव, लायन्स क्लव अफ नारायणगढ नारायणी र लियो क्लव अफ नारायणगढले सोमबार गैंडाकोटस्थित श्री नेपाल राष्ट्रिय शमशेर आदर्श माविमा अध्ययनरत विद्यार्थीहरुको रक्त समूह परीक्षण गरिएको हो ।
कार्यक्रमको लायन्स क्लव अन्तर्राष्ट्रि डिष्ट्रिक्ट ३२५ आर नेपालका निवर्तमान गर्भनर लायन सिद्धार्थलाल चुकेले रक्त समूह परीक्षण किट प्राविधिकहरुलाई हस्तान्तरण गरेर समुद्घाटन गरे । कार्यक्रम भरतपुरस्थित अस्पताल रोडमा रहेको फेवा प्याथोलोजीको प्राविधिक सहयोगमा गरिएको हो । ल्याबका प्रमुख टिका पंगेनी, मोहन तिवारीलगायत १० जनाको स्वास्थ्यकर्मीको टिमले रक्त समूह परीक्षण गरेको हो ।
कार्यक्रमको समुद्घाटन चुकेले लायन्स धेरै वर्षपछि रक्त समूह परीक्षण कार्यक्रम गरेकोमा खुशी व्यक्त गर्दै सामान्य तर निकै आवश्यक विषयलाई सबैले ध्यान दिनुपर्नेमा जोड दिए । कार्यक्रममा लायन्स क्लव अन्तर्राष्ट्रि डिष्ट्रिक्ट ३२५ आर नेपालका प्रथम भाईस डिष्ट्रिक्ट गर्भनर लायन दिनानाथ न्यौपाने, विद्यालय व्यवस्थापन समितिका अध्यक्ष कविराज आचार्यलगायतले मन्तव्य व्यक्त गरे । कार्यक्रममा करिव ५ सय विद्यार्थीहरुको रक्त समूह परीक्षण गरिएको विद्यालयका प्रिन्सिपल इन्द्रराज भट्टराईले जानकारी दिए ।
कार्यक्रम संयोजक सनद पियाले स्वागत मन्तव्य व्यक्त गरेको कार्यक्रम लायन्स क्लव अफ नारायणगढ नारायणीकी सचिव जोशिला पियाले संचालन गरेकी थिइन् । फेवा ल्याबले रक्त समूह परीक्षण गरिएको कार्ड लिएर अन्य परीक्षण गर्न जाँदा २० प्रतिशत छुटको व्यवस्था समेत गरिएको संचालक टिका पंगेनीले जानकारी दिए । कार्यक्रममा विद्यार्थीहरुको उत्साहजनक सहभागिता रहेको कार्यक्रम संयोजक नारायणगढ नारायणी राममाया जोशी श्रेष्ठले जानकारी दिइन् । कार्यक्रम नारायणगढ लायन्स क्लवका अध्यक्ष शान्त कुमार पिया, नारायणगढ नारायणीकी अध्यक्ष अञ्जु पिया र लियो क्लव अफ नारायणगढका अध्यक्ष देवचन भट्टको अध्यक्षतामा सम्पन्न भएको थियो ।