रत्ननगर, १९ साउन
चितवनको रत्ननगर नगरपालिका वडा नं. १५ ले सिलाई कटाई सीप सिकेका महिलालाई शुक्रबार सिलाई मेसिन प्रदान गरेको छ ।
वडा अध्यक्ष आसिक तामाङले एक कार्यक्रमका बिच सिलाई मेसिन हस्तान्तरण गरेका हुन् । यस अघि दिएको ३ महिने सिलाई कटाई तालिम असार ११ गते सम्पन्न भएको थियो । सोही तालिममा सहभागी भएर सीप सिकेका ८ जना महिलाहरुलाई सिलाई मेसिन प्रदान गरेका हुन् ।
वडा अध्यक्ष तामाङले महिलाहरुलाई सिलाई पेशातर्फ आकर्षित गरी आत्मनिर्भर बनाउने उद्देश्यले सिलाई मेसिन वितरण गरिएको बताए । आफूले सिकेको सीपलाई सक्दो उपयोग गरी स्वरोजगार बन्न उनले आग्रह गरे । हातमा सीप भएको मान्छे कहिल्यै भोको बस्नु नपर्नेमा जोड दिए ।
कार्यक्रममा वडा सदस्य लिलादेवी पोख्रेल, रुकमाया परियार, शिवप्रसाद तिवारी, इमप्रसाद पन्त, वडा सचिव रुपबहादुर पण्डित क्षेत्री लगायतको सहभागिता रहेको थियो।
