चितवन, जेठ २६ –
अखिल नेपाल राष्ट्रिय स्वतन्त्र विद्यार्थी युनयिन (अनेरास्ववियु) भरतपुर महानगर कमिटीले भरतपुरमा सञ्चालित नीजि विद्यालयले तोकिए बमोजिम छात्रवृत्ति नदिएकोप्रति गम्भीर ध्यानाकर्षण भएको जनाएको छ ।
भरतपुर महानगरपालिका शिक्षा शाखा र नीजि विद्यालयहरुको छाता संगठन प्याबसनमा विज्ञप्ति बुझाउँदै अनेरास्ववियुले ध्यानाकर्षण गराएको हो ।
विज्ञप्तिमा भनिएको छ, ‘पालिकाभित्र संचालित केही संस्थागत विद्यालयका विद्यार्थी तथा अभिभावकले विद्यार्थीहरूलाई छात्रवृत्ति नदिएको र अन्यायमा परेको जस्ता गुनासो हाम्रो संगठन समक्ष गरेकोले यस विषयप्रति हाम्रो संगठनको गंभीर ध्यानाकर्षण भएको छ । शिक्षा तथा खेलकुद सम्बन्धि ऐनले संस्थागत विद्यालयले विद्यालयमा भर्ना भएका कुल विद्यार्थी संख्याको कम्तीमा दश प्रतिशतमा नघट्ने गरी तोकिए बमोजिम विपन्न, अपांग, महिला, दलित, वा जनजाति विद्यार्थीलाई निस्शुल्क छात्रवृत्ति उपलब्ध गराउनु पर्नेछ । भन्ने व्यवस्था गरेको छ । यसै व्यवस्थालाई मध्यनजर गर्दै हरेक विद्यालयले नियमअनुसारको छात्रवृत्ति प्रदान गरी छात्रवृत्ति प्रदान गरेका विद्यार्थीको नामावली समेत प्रकाशन गर्न सबै विद्यालयलाई अनुरोध गर्दछौं ।’
विद्यार्थी आन्दोलनबाट प्राप्त अधिकारको सुनिश्चितता गर्दै विद्यार्थीको छात्रवृत्ति सम्बन्धिको समस्या तथा सहुलियत बारेमा छिटो समस्या समाधान तथा कार्यान्वयन तर्फ लाग्न आग्रह गर्दै अनेरास्ववियुले पुनः आन्दोलन गर्नुपर्ने बाध्यता सृजना नगराउन चेतावनी समेत दिएको छ ।