भरतपुर – भरतपुर महानगरपालिका १२ मा जारी अन्तर टोलस्तरीय नाकआउट फुटबलमा सेमिफाइनल प्रवेश गर्ने सबै टोलीको टुङ्गो लागेको छ ।
आज (सोमबार) थप तीन टोलीको टुङ्गो लागेसँगै सेमिफाइनल समीकरण पूरा भएको हो । प्रतियोगिता अन्तर्गत आजको पहिलो खेलमा सहयोगी टोलले हाम्रो टोललाई २-० ले पाखा लगायो ।
सहयोगी टोलको जितमा दिनेश मगरले पहिलो हाफलो १५ औं मिनेटमा गोल गरे । दोस्रो हाफको २४ औं मिनेटमा मौसम दराईले गोल गर्दै सहयोगीको जित सुनिश्चित गरे । दिनेश दराई म्यान अफ दि म्याच चुनिए ।
आजको दोस्रो खेलमा आस्था टोलले दीपेन्द्र टोललाई पाखा लगाउँदै सेमिफाइनलमा स्थान बनायो । आस्थाले दीपेन्द्रलाई १-० ले पराजित गर्यो । आस्थाको जितमा दिनेश मगरले १३ औं मिनेटमा गोल गरे । उनी नै म्यान अफ दि म्याच बने ।
आजको तेस्रो खेलमा सिर्जनशील टोलले नौरङ्गेलाई निराश बनायो । प्रतिस्पर्धात्मक खेलमा सिर्जनशील टाइब्रेकरमा विजयी भयो । निर्धारित समयको खेल बराबरी सकिएपछि खेलको निर्णय टाइब्रेकरमा भएको हो । टाइब्रेकरमा सिर्जनशील ३-२ ले विजयी भयो । सिर्जनशीलमा गोलरक्षक सबिन दाहाल म्यान अफ दि म्याच चुनिए ।
मंगलबार फाइनल प्रवेशका लागि दुई खेल हुनेछ । पहिलो खेलमा दिउँसो ३ बजे आस्था र सहयोगी टोल भिड्दा दोस्रो खेलमा दिउँसो ४:१५ बजे सिर्जनशील र कालिका टोल भिड्नेछन् ।
१८ गतेसम्म चल्ने प्रतियोगिताको विजेताले ४० हजारसहित ट्रफी प्राप्त गर्ने गर्नेछ । यस्तै उपविजेताले २० हजार रुपैयाँ प्राप्त गर्नेछ । विधागत उत्कृष्ट खेलाडीहरुलाई पनि पुरस्कारको व्यवस्था गरिएको छ ।
