चितवन,जेठ ३-
चितवन रोटरी क्लबले अपाङ्गता भएका व्यक्तिलाई ४ थान ह्विल चेयर वितरण गरेको छ । बुधवार भरतपुर महानगरपालिका–३ का वडाध्यक्ष विकास थापाको समन्वयमा शारीरिक अपाङ्गता तथा आर्थिक स्थिति कमजोर भएका स्थानीय व्यक्तिलाई ४ थान ह्विल चेयर वितरण गरिएको क्लबका सचिव तथा कार्यक्रम संयोजक राजन पियाले जानकारी गराए ।
क्लबका अध्यक्ष दीपक प्रधानले ह्विल चेयरहरू वितरण गरेका छन् । शारीरिक अपाङ्गता भएका व्यक्तिहरूलाई उनीहरूकै निवासमा गएर ह्विल चेयर वितरण गर्न पाउँदा आत्मसन्तुष्टि र खुशी मिलेको वर्ष २०२३/२४ का लागि क्लबका निर्वाचित अध्यक्ष चन्द्रेश्वर भट्टराईले बताए । ह्विल चेयर वितरण कार्यमा वडा सदस्य राम लोहनीको सहयोग प्राप्त भएको संयोजक पियाले बताए ।
स्वार्थभन्दा माथि सेवाको भावनाले स्थापित चितवन रोटरी क्लबले ३ दशकदेखि समाज सेवाको क्षेत्रमा योगदान पुर्याउँदै आएको र रोटरीले दृष्टि नपुगेको ठाउँमा उज्यालो छर्नेदेखि पोलियो उन्मूलनमा संसारभर नै योगदान दिएको क्लबका अध्यक्ष दीपक प्रधानले बताए । अध्यक्ष प्रधानले समाज सेवाको क्षेत्रमा अग्रसर हुन पाउनु अत्यन्तै सुखद रहेको र यसबाट आनन्द प्राप्त हुने बताउँदै सम्पूर्ण मानव जगतको सुख, शान्ति र समृद्धिको लागि आफू सधैं लागिरहने बताए ।
