– हिरालाल आचार्य ‘डायमण्ड’
चितवन, फागुन २६ –
त्रिविको आंगिक क्याम्पस वीरेन्द्र बहुमुखी क्याम्पसमा स्ववियु अध्यक्षको उम्मेद्वारमा नेविसंघले सुवास पौडेललाई उठाउने भएको छ ।
आज बसेको नेपाल विद्यार्थी संगठन (नेविसंघ) वीरेन्द्र क्याम्पस कमिटीको बैठकमा पौडेललाई अध्यक्षको उम्मेद्वार बनाउन निर्णय गरिएको हो ।
विद्यार्थीहरुमाझ आफ्नो प्रभुत्व जमाउन सफल, मिलनसार, स्वभावका पौडेल बिबिएस चौथो वर्षमा अध्ययनरत छन् ।
२१ सदस्यीय स्वतन्त्र विद्यार्थी युनियन (स्ववियु) का लागि नेविसंघले अन्य पदका लागि उम्मेद्वारको नाम टुंगाइसकेको छैन । वीरेन्द्रमा ६ हजार विद्यार्थीको प्रारम्भीक मतदाता नामावली सार्वजनिक भइसकेको छ ।
क्याम्पसमा २१ वटा संगठनहरुले आफ्नो नाम दर्ता गराएका छन् ।
अर्को मुख्य संगठन अनेरास्ववियुले सुदिप प्रसाद पौडेललाई स्ववियु अध्यक्षमा उठाउने निर्णय गरिसकेको छ । वीरेन्द्रमा पौडेल द्वयको कडा भिडन्त हुने देखिएको छ ।
त्रिविको आंगिक क्याम्पस वीरेन्द्रमा चुनाव हुन नसके चितवनका अन्य क्याम्पसमा पनि नहुने संभावना रहने भएकाले सम्पूर्ण विद्यार्थी संगठन जिम्मेवार भएर शान्तपूर्ण तरिकाले चुनाव सफल पार्न लाग्नुपर्ने राजनैतिक विश्लेषकहरु बताउँछन् ।
त्रिवि अन्तर्गतका चितवनका २० वटा क्याम्पसमा संगठन दर्ता भइसकेको छ । स्ववियु निर्वाचन त्रिवि अन्तर्गतका क्याम्पसमा चैत्र ५ गते देशभर एकसाथ गर्ने समयतालिका छ ।
