– हिरालाल आचार्य ‘डायमण्ड’
चितवन, फागुन २२ –
त्रिविको आंगिक क्याम्पस वीरेन्द्र बहुमुखी क्याम्पसमा स्ववियु सभापतिको उम्मेद्वारमा अनेरास्ववियुले सुदिप प्रसाद पौडेललाई उठाउने भएको छ ।
आज बसेको अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) वीरेन्द्र क्याम्पस कमिटीको बैठकमा पौडेललाई सभापतिको उम्मेद्वार बनाउन सर्वसम्मत निर्णय गरिएको हो । पौडेललाई उम्मेद्वार बनाउन क्याम्पस कमिटीका इन्चार्ज विज्ञान अधिकारीले प्रस्ताव गरे भने बैठकले उक्त प्रस्तावलाई निर्विरोध पारित गरेको हो ।
अनेरास्ववियु क्याम्पस कमिटीका अध्यक्ष समेत रहेका पौडेल विद्यार्थीहरुमाझ निकै लोकप्रिय विद्यार्थी नेता हुन् । विद्यार्थीहरुमाझ आफ्नो प्रभुत्व जमाउन सफल, मिलनसार, शान्त एवम् शालिन स्वभावका पौडेललाई स्ववियु सभापतिको प्रमुख दाबेदारका रुपमा हेर्न थालिएको छ । २१ सदस्यीय स्वतन्त्र विद्यार्थी युनियन (स्ववियु) का लागि अनेरास्ववियुले अन्य पदका लागि उम्मेद्वारको नाम टुंगाइसकेको छैन । वीरेन्द्रमा ६ हजार विद्यार्थीको प्रारम्भीक मतदाता नामावली सार्वजनिक भइसकेको छ ।
क्याम्पसमा २१ वटा संगठनहरुले आफ्नो नाम दर्ता गराएका छन् । स्वतन्त्र विद्यार्थी मञ्चले पुजा कँडेललाई स्ववियु सभापति उठाउने निर्णय गरिसकेको छ । अनेरास्ववियुबाहेक अन्य मुख्य संगठनहरुले स्ववियु सभापतिको नाम टुंगाइसकेका छैनन् । अर्काे मुख्य संगठन नेविसंघबाट सुवास पौडेललाई उम्मेद्वार बनाउने चर्चा चलिरहेको छ । अखिल क्रान्तिकारीले पनि अझै कुनै निर्णय गरिसकेको छैन ।
विगतमा सबै विद्यार्थी संगठन र क्याम्पस प्रशासन समेत स्ववियु चुनावप्रति जिम्मेवार नेदिखँदा वीरेन्द्र क्याम्पसमा पटकपटक स्ववियु निर्वाचन रोकिएको तितो इतिहास छ ।
त्रिविको आंगिक क्याम्पस वीरेन्द्रमा चुनाव हुन नसके चितवनका अन्य क्याम्पसमा पनि नहुने संभावना रहने भएकाले सम्पूर्ण विद्यार्थी संगठन जिम्मेवार भएर शान्तपूर्ण तरिकाले चुनाव सफल पार्न लाग्नुपर्ने राजनैतिक विश्लेषकहरु बताउँछन् ।
चितवनका १८ वटा क्याम्पसमा संगठन दर्ता भइसकेको छ । २ वटा क्याम्पसमा २६ गते संगठन दर्ता हुनेछ । स्ववियु निर्वाचन त्रिवि अन्तर्गतका क्याम्पसमा चैत्र ५ गते देशभर एकसाथ गर्ने समयतालिका छ ।
