माधव सापकोटा
माघ २१ ,चितवन
भरतपुर -४, धर्मचोक , लङ्कु, चितवनस्थित श्री वैकुण्ठनाथ परमवैदिक विद्याप्रतिष्ठानम्(गुरुकुलम्)को सुसञ्चालन र सर्वाङ्गीण विकासका लागि बृहद् अक्षयकोष स्थापनार्थ १५ दिने श्री लक्ष्मीवैकुण्ठनाथ वैदिक विद्या संरक्षण महायज्ञ महोत्सव २०७९ को प्रारम्भ भएको छ ।
महायज्ञको साधु-सन्त-महात्मा,विद्वान् -विदुषी ,विचारकहरूको पावन सान्निध्यमा वाग्मती प्रदेश आर्थिक मामिला तथा योजना मन्त्री जगन्नाथ थपलियाले दीप प्रज्वलन गरेर उद्घाटन गर्नुभएको हो।
उद्घाटन समारोहमा बोल्दै उहाँले प्रदेश सरकारबाट गुरुकुलको विकासका लागि बजेट छुट्टयाउन आफुले पहल गर्ने बताउनुभयो।कार्यक्रममा सम्पूर्णानन्द संस्कृत विश्व विद्यालय वाराणसीका प्राध्यापक हरिप्रसाद अधिकारी,कथावाचिका यशोदा माता,नेकपा एमाले पोलिट ब्यूरो सदस्य देवीप्रसाद ज्ञवाली, वाग्मती प्रदेश सभा सदस्य उत्तम जोशी, राष्ट्रिय स्वतन्त्र पार्टी चितवनका सचिव कृष्णप्रसाद भुसाल, सल्लाहकार कलाधर अर्याल, भरतपुर-४ का वडा सदस्य राधादेवी कँडेल लगायतले बोल्नुभएको थियोे ।
कार्यक्रममा बोल्ने अधिकांश वक्ताहरूले धर्मसंस्कृति – राष्ट्रियताको संरक्षणका लागि गुरुकुल बचाउनुपर्ने बताउँदै सहयोगका लागि आह्वान गरेका थिए। उद्घाटन समारोहअगि पन्चै बाजा ,कलश, भजन-कीर्तनसहित महायज्ञस्थलबाट निक्लेको शोभायात्राले धर्मचोक, अद्वैतचोक,धारापानीचोक , वैकुण्ठचोक परिक्रमा गरी पुन: महायज्ञस्थलमा आई टुंगिएको थियो।
कार्यक्रम महायज्ञ सम्पादन मूल समितिका संयोजक तुलसीराम सापकोटाको सभापतित्वमा सम्पन्न भएको थियो। अनन्त श्रीविभूषित त्रिदण्डी पराङ्कुशाचार्य(शठकोप) जीयर स्वामी, नेपाल सन्त समाजका अध्यक्ष स्वामी ज्ञानानन्द सरस्वती, श्री वैष्णव परिषद् नेपालका अध्यक्ष स्वामी देवराजाचार्य लगायत देश-विदेशका प्रमुख सन्त-महात्मा,कथावाचक, विद्वान् , विचारकहरूको आशीर्वचन, दैनिक प्रवचन तथा पीठाधीश स्वामी जगन्नाथाचार्यको शिवसंकल्पमा डा. कमलनयनाचार्य रिजालको यज्ञाचार्यत्वमा हुने महायज्ञको प्रथम चरण माघ २२ देखि २८ सम्म यशोदादेवी कौण्डिन्य माता तथा द्वितीय चरण माघ २९ देखि फागुन ६ सम्म अन्तर्रास्ट्रिय ख्यातिप्राप्त कथावाचक ईश्वरकृष्ण महाराजले राम-कृष्णकथामृत प्रवचन गर्ने आयोजकले जनाएको छ।
कार्यक्रममा सहभागी हुन समस्त वैदिक विद्याप्रेमीजनहरूलाई आयोजक समितिले आह्वान गरेको छ। लक्ष्मीवैकुण्ठनाथ मन्दिरको प्रतिष्ठापूर्व नै २०२७ सालतिरबाटै अनौपचारिकरूपमा स्वामी , गुरु एवम् पुजारीहरूबाट विद्यार्थीहरूलाई यथोचित शिक्षा दिने कार्य चल्दै आएकोमा वर्तमान पीठाधीश जगन्नाथाचार्य स्वामीको अभिषेकपछि २०४१ सालबाट वेद-वेदाङ्गको अध्यापनका लागि गुरुकुलको स्थापना गर्ने कार्यलाई अगाडी बढाई २०४४ साल पुस २२ गते परमानन्द गुरुबाट उद्घाटन भएको सो गुरुकुलमा २०७१ सालमा सम्बद्ध प्रशासनिक निकायबाट कक्षा ६ को मान्यता प्राप्त गरी २०७६ सालदेखि क्रमशः कक्षा ९ हुँदै यसै वर्षदेखि कक्षा १२सम्म संचालन भइरहेको यस गुरुकुलमा अहिले देशका विभिन्न क्षेत्रबाट आएका ५५ जना विद्यार्थीहरूले आवासभोजनसहित नि: शुल्क शिक्षा लिइरहेको आयोजकले जनाएको छ।
गुरुकुलमा हाल संचालित माध्यमिक तहको गुरुकुलीय संस्कृत शिक्षालाई सुव्यवस्थित , गुणस्तरीय र समृद्ध बनाउँदै उच्च शिक्षाका लागि आवश्यक पूर्वाधार तयार गरी स्नातक हुँदै स्नातकोत्तरसम्म पुर्याउने लक्ष्य लिइएको र सो लक्ष्य प्राप्तिका लागि हाल गुरुकुलमा रहेको कोष अत्यन्त न्यून रहेकाले जनसहयोगबाट एक बृहत् अक्षयकोष स्थापना गरी त्यसको ब्याजबाट गुरुकुल संचालन गर्न महायज्ञको आयोजना गरिएको हो।