चितवन, माघ २०
सौराहामा तीन दिने फुड फेस्टिबल हुने भएको छ । क्षेत्रीय रेष्टुरेन्ट एण्ड बार एशोसिएशन (रेवान) सौराहा र रेवान महिला समूहको संयुक्त आयोजनामा ‘प्रणय दिवस’ को अवसर पारेर कार्यक्रम आयोजना गर्न लागिएको हो ।
आयोजकले आज पत्रकार सम्मेलन गरी यसबारे जानकारी गराएको छ । फुड फेष्टिबलका संयोजक ध्रुव गिरीले १७ औँ संस्करणको सौराहा फुड फेस्टिबल माघ २९ देखि २ गतेसम्म गर्न लागिएको जानकारी दिए ।
गिरीका अनुसार माघ २९ र फागुन १ गते साँझ ५ बजे देखि राति १० बजेसम्म र फागुन २ गते ‘प्रणय दिवस’ को दिन साँझ ५ बजे देखि राति ११ बजे सम्म कार्यक्रम हुनेछ ।
उनका अनुसार फेस्टिबलमा नेपालका विभिन्न समुदाय र जातिका खानाका परिकारदेखि अन्तर्राष्ट्रिय स्तरका खानाको परिकार उपलब्ध हुने जनाइएको छ । सडकमा हुने फुड फेस्टिबलमा बिभिन्न जातजातिहरुको झाँकीहरुको प्रस्तुती रहने छ । फेस्टिबलमा अन्य विभिन्न कार्यक्रम पनि रहेका छन् ।
