चितवन, माघ १२-
श्रीसनातन संस्कृति संरक्षण अभियान र श्रीगण्डकी–नारायणी संरक्षण महाआरती परिषद्को संयुक्त आयोजनामा नारायणी किनारमा महायज्ञ सुरु भएको छ ।
बसन्त पञ्चमीको अवसरमा आज महायज्ञको सहरी विकासमन्त्री विक्रम पाण्डेले एक समारोहकाबीच उद्घाटन गरेका हुन् ।
उद्घाटन कार्यक्रममा बोल्दै मन्त्री पाण्डेले कोटिहोम महायज्ञ केवल हिन्दुहरुको लागि मात्र नभई समस्त नेपाली र नेपालको लागि भएको बताए ।
उनले भने, विश्व शान्ति र मानव जातिको लागि कोटीहोम महायज्ञ नारायणी नदी किनारमा आयोजना हुनु गौरवको कुरा हो । त्यसकारण सबै धर्मका व्यक्तिहरुले यहाँ आएर पुण्य कमाउनुहोस् ।
कोटीहोम महायज्ञको उद्घाटनअघि नारायणगढ बजार क्षेत्र परिक्रमा गर्नेगरी कलश यात्रा निकालिएको थियो ।
फागुन १२ गते महायज्ञको अन्तिम दिन एक करोड ४९ लाख ८५ हजार बत्ती बालिने महायज्ञ संयोजक एवम् श्रीगण्डकी–नारायणी संरक्षण महाआरती परिषद्का अध्यक्ष प्रेमनिधि कँडेल ९भारद्धाज०ले बताए ।
सनातन संस्कृति–गोवंश संरक्षणबारे चिन्तन, मन्थनसहित प्रवचन, सवा करोड ५ सरे दीपप्रज्वलन, राष्ट्रिय तथा अन्तर्राष्ट्रिय ख्यातिप्राप्त कवि÷कलाकारहरूद्वारा कवितावाचन, भजन, सांस्कृतिक झाँकी, वरिष्ठ चिकित्सकहरूद्वारा निःशुल्क स्वास्थ्य परीक्षण, रक्तदान कार्यक्रम, योग, ध्यान एवम् बालसंस्कार कार्यक्रम, १०८ शालीग्राम तथा शिवलिङ्गको सेवा–पूजा, दर्शन सामूहिक व्रतबन्ध, चौरासी, ग्रहशान्ति लगायत कार्यक्रम गरिने भएको छ ।
समाजका अध्यक्ष एवम् हरिहर सन्यास आश्रमका पिठाधीश श्री १००८ स्वामी ज्ञानानन्द सरस्वती महाराज महायज्ञको प्रमुख संरक्षक रहेका छन् ।
महायज्ञमा १०८ कर्मनिष्ठ ब्राह्मणहरूद्वारा सवा करोड गायत्री मन्त्रद्वारा १ महिनासम्म हवन, तर्पण एवम् मार्जन, श्रीमद्भागवत तथा शिवमहापुराण पाठ एवम् प्रवचन, विभिन्न सनातन धर्ममूलक पन्थ, सम्प्रदायका विशिष्ट विद्वान्, सन्त, मठाधीश, गुरु, सामाजिक एवम् राजनीतिक व्यक्ति सहभागी हुने छन् ।
महायज्ञ सम्पन्न गर्न साढे दुई करोड रुपैयाँ खर्च हुने अनुमान गरिएको छ । महायज्ञको प्रमुख वाचक परशुराम पाण्डेय रहेका छन् ।
