माधव सापकोटा
माघ ८ ,चितवन –
लक्ष्मीवैकुण्ठनाथ मन्दिर, भरतपुर -४, धर्मचोक , लङ्कु, चितवनद्वारा स्थापित र संचालित श्री वैकुण्ठनाथ परमवैदिक विद्याप्रतिष्ठानम्(गुरुकुलम्)को सुसंचालन र सर्वाङ्गीण विकासका लागि बृहद् अक्षयकोष स्थापनार्थ अनन्त श्रीविभूषित त्रिदण्डी पराङ्कुशाचार्य(शठकोप) जीयर स्वामी, नेपाल सन्त समाजका अध्यक्ष स्वामी ज्ञानानन्द सरस्वती, श्री वैष्णव परिषद् नेपालका अध्यक्ष स्वामी देवराजाचार्य लगायतका नेपालका प्रमुख आचार्य, सन्त, महात्मा, विद्वान् , विचारकहरू समेतको यथासमय संरक्षण, मार्गनिर्देशन ,आशीर्वचन तथा पीठाधीश स्वामी जगन्नाथाचार्यको शुभ संकल्पमा माघ २१ देखि फागुन ६ गतेसम्म हुने श्री लक्ष्मीवैकुण्ठनाथ वैदिक विद्यासंरक्षण महायज्ञ महोत्सव २०७९ नजिकिँदै जाँदा तयारी कार्य तीव्र गतिमा भइरहेको छ ।
महायज्ञको यज्ञमण्डप निर्माणकार्यको आज शुभारम्भ भएको छ। गुरुकुलका प्रधान संरक्षक स्वामी जगन्नाथाचार्यको करकमलबाट भूमिपूजनसहित मण्डपनिर्माण प्रारम्भ भएको हो। यसैबिच भरतपुर -१९ गुन्जनगरमा बसेको एक भेलाले प्रजापति सापकोटाको संयोजकत्वमा महायज्ञ सम्पादन भरतपुर -१९ क्षेत्रीय समिति गठन गरेको छ। यसैगरी समितिको सह -संयोजकमा जयभद्र सापकोटा , सचिवमा जयनारायण सापकोटा ,सह-सचिवमा नारायणप्रसाद सापकोटा ,कोषाध्यक्षमा प्रदत्त सापकोटा , सदस्यहरूमा सरस्वती कंडेल ,हरिप्रसाद सापकोटा ,देवराज सापकोटा ,लेखनाथ सुवेदी,हरिकृष्ण सापकोटा ,टीकाराम सापकोटा ,दुर्गाप्रसाद सापकोटा , शिवदत्त सापकोटा ,हरिदास सापकोटा,विमला कंडेल , टीकाराम (पुरुषोत्तम) सापकोटा , माधव सापकोटा चयन हुनुभएको छ।
स्वामी जगन्नाथाचार्यको सान्निध्यमा भएको भेलामा महायज्ञ सम्पादन मूल समितिका संयोजक तुलसीराम सापकोटा , गुरुकुलका पूर्व प्रधानाध्यापक दामोदर सापकोटा ,मूल समिति सदस्य नारायणचारी सापकोटा लगायतको उपस्थिति रहेको रहेको सो भेलामा बोल्ने अधिकांश वक्ताहरूले सनातन धर्मसंस्कृति ,राष्ट्रियताको रक्षाका लागि गुरुकुल बचाउनुपर्ने आवश्यकता औंल्याउँदै सहयोगका लागि आह्वान गरेका थिए।
महायज्ञको प्रथम चरण माघ २२ देखि २८ सम्म्म यशोदादेवी कौण्डिन्य माता तथा द्वितीय चरण माघ २९ देखि फागुन ६ सम्म अन्तर्रास्ट्रिय ख्यातिप्राप्त कथावाचक ईश्वरकृष्ण महाराजले भगवान् राम-कृष्ण चरित्रमा आधारित प्रवचन गर्ने आयोजकले जनाएको छ। महायज्ञको पहिलो दिन माघ २१ गते बिहान १० बजेदेखि लीला- झाँकीसहित विशाल शोभायात्रा एवम् उद्घाटन हुने तथा माघ २२ देखि फागुन ६ गतेसम्म बिहान ६ बजेदेखि १० बजेसम्म चार वेद, अठार पुराण, रामायण, महाभारत आदि धर्मग्रन्थ पारायण , विशेष पूजा, अर्चना, हवन, बिहान ११ बजेदेखि २ बजेसम्म प्रमुख वाचकबाट सङ्गीतमय श्रीरामकृष्णचरितामृत कथा-प्रवचन,दाता सम्मान, दिउसो २ बजेदेखि ४:३० बजेसम्म विशिष्ट आचार्य , विद्वान् विचारकहरूबाट प्रवचन , बेलुका ४ :३० बजेदेखि ५:३० बजेसम्म आरती, तीर्थ-प्रसाद वितरण, साँझ ७ बजेदेखि १० बजेसम्म राष्ट्रिय कलाकारहरूबाट साङ्गीतिकभजन,लीला- झाँकी तथा नाटक प्रदर्शन हुने सो कार्यक्रममा सहभागी हुन समस्त वैदिक विद्याप्रेमी भक्तजनहरूलाई आयोजक समितिले आह्वान गरेको छ।
२०४४ सालमा स्थापना भएको हाल कक्षा ६ देखि १२ सम्म पढाइ हुने सो गुरुकुलमा देशका विभिन्न स्थानबाट आएका ५५ जना विद्यार्थीहरू अध्ययन गरिरहेका छन् । भविष्यमा स्नातक हुँदै स्नातकोत्तरसम्म लैजाने गुरुकुलको लक्ष्य रहेको प्रधानाध्यापक डा. लक्ष्मीनाथ कंडेलले जानकारी दिनुभयो।
