चितवन, पुस ९
सडक डिभिजन कार्यालय भरतपुरले शुक्रबारबाट नारायणगढमा सुरु गरेको मापदण्ड विपरितका घर भत्काउने अभियान आज शनिबार जारी राखेको छ ।
शुक्रबार लायन्सचोक र पुल्चोकबीचमा दक्षिणतर्फका घरटहरा भत्काएको कार्यालयले आज सोही ठाउँमा सडकको उत्तरतर्फको संरचना भत्काएको हो । सडक सीमा मिचेर बनाएको घर टहरा भत्काउन पटक पटक आग्रह गर्दा पनि नभत्काएपछि डोजर चलाइएको सडक डिभिजन कार्यालयले जनाएको छ । डोजरले घर टहरा भत्काउन थालेपछि कतिपय घरधनीले भने आफ्नो संरचना आफैं भत्काएका छन् ।
डोजर चलाएको भन्दै कतिपय राजनीतिक दलका नेता र व्यवसायीहरुले विरोध गरेका छन् । कांग्रेस चितवनका पूर्वसभापति जितनारायण श्रेष्ठले नारायणगढ बजार सुन्दर चितवनको परिचय भएकोले तत्काल डोजर आतंक बन्द गर्न माग गरेका छन् । उनले फेसबुकमा यसबारे प्रतिक्रिया दिँदै भनेका छन्, ‘नारायणगढका घरहरूमा जबरजस्ती डोजर चलाइयो र अझै जारी छ । राज्यलाई कर तिरेकै छ,महानगरले नक्सा पास गरेर राजश्व संकलन गरेकै हो । बिना संवाद सरोकार पक्षको उपस्थितिबिना जबर्जस्ती डोजर चलाउन पाइँदैन । नारायणगढ बजार सिंगो सुन्दर चितवनको परिचय पनि हो । तत्काल डोजर आतंक बन्द गर, पिडित व्यावसायी र घरवालालाई न्याय देउ ।’
नारायणगढ गोन्द्राङ सडकखण्डको विस्तारको ठेक्का पाएको निर्माण कम्पनीले सडक डिभिजनलाई सडक सिमा क्लियर गरिदिन दबाब दिएको थियो । डिभिजनले सडक मिचेर बनेका संरचना नभत्काए सडक विस्तारको काम गर्न नसक्ने भन्दै दबाब दिएको थियो । ठेक्काको म्याद सकिन जम्मा ३ महिना मात्रै बाँकी रहेको अवस्थामा सडक विस्तारका लागि अवरोध गरी बनेका संरचना भत्काउन डिभिजन माथि दबाव परेको थियो ।
सडक डिभिजन कार्यालय भरतपुरका सूचना अधिकारी चण्डेश्वर साहले संरचना भत्काउन थालिएको अभियान नरोकिने बताए । डिभिजनले सडकको मध्यबाट दुवैतर्फ २५–२५ मिटर आफ्नो सडक क्षेत्र रहने भनेको छ । नारायणगढका चर्चित भेटघाट तास रेष्टुरेन्ट र बैष्णव मिष्ठान्न भण्डारका घर समेत भत्काएको छ ।
