– हिरालाल आचार्य ‘Diamond’
चितवन, पुष ५ –
यौन दुव्र्यवहारका आरोपित भरतपुरको अरोमा कलेजका कम्प्युटर ल्याबका शिक्षक रामकृष्ण सुवेदीलाई प्रहरीले नियन्त्रणमा लिएको छ ।
नियन्त्रणमा लिएर अनुसन्धान अगाडि बढाइएको जिल्ला प्रहरी कार्यालय चितवनका प्रवक्ता विजय राज पण्डितले जानकारी दिए ।
शिक्षक सुवेदीले कलेजमा अध्ययनरत ११ र १२ कक्षाका छात्राहरुलाई कम्प्युटर ल्याबभित्र कम्प्युटर सिकाउने क्रममा सम्बेदनशिल अंगहरुमा छुने, हात सुमसुम्याउने, अंकमाल गर्न खाज्ने गरेको विद्यार्थीहरुको अरोप छ ।
यसबारे ४ दिन अघि कलेज प्रशासनलाई जानकारी गराए पनि प्रशासनले कुनै कारबाही नगरी पुनः कलेजमा पढाउन बोलाएपछि आफूहरु आन्दोलनमा उत्रिनु परेको आन्दोलित विद्यार्थीहरुको भनाइ छ ।
आज विद्यार्थीहरुले आन्दोलन गर्दै कलेजका बस र कलेजका झ्यालढोका तोडफोड समेत गरेको थिए । १ बजेबाट प्रदर्शनमा उत्रिएका विद्यार्थीहरु राति ६ः३० बजेसम्म टाएर बालेर प्रदर्शन गरिरहेका थिए । प्रदर्शनका क्रममा केही विद्यार्थी घाइते समेत भएका छन् ।
भिडियो :
भरतपुर १० स्यालीबजारको सडकखण्ड अवरुद्ध गराएर विद्यार्थीहरले प्रदर्शन गरेका थिए । उनीहरुले शिक्षक सुवेदीको तस्विरसहित आफ्नो टाई र विद्यालयका विभिन्न ब्यानरहरुलाई जम्मा गरेर आगजनी गरेका थिए ।
साँझ पख विद्यार्थीहरु टायर बालेर प्रदर्शनमा उत्रिएका थिए । स्थिति तनावपूर्ण भएपछि सुरक्षाकर्मीको बाक्लो उपस्थिति गराइएको थियो ।
