काठमाडौं ,मंसिर १७ –
काठमाडौं महानगरभित्र भएका निजी साझेदारी कार्यक्रम अन्तर्गतका आकाशे पुलहरु तत्काल मर्मत गर्नुपर्ने महानगरकी उपप्रमुख सुनिता डंगोलले बताएकी छिन् ।
सार्वजनिक निजी साझेदारी एकाईका अधिकारीहरुसँग कुरा गर्दै उपप्रमुख डंगोलले आजका दिनमा आकाशे पुल असुरक्षित भएकोले सुधारका काम तत्काल गर्नुपर्ने खाँचो देखाउँदै यस्तो बताएकी हुन् ।
‘आकाशे पुलका संरचना भत्किएका छन् । हिँड्दा अल्झिएर लड्ने अवस्था छ । बारहरु अग्ला भएकाले साँझ–बिहान पुलभित्र हिँड्न असुरक्षित हुन्छ । अपाङ्गता भएका व्यक्ति पुलबाट यात्रा गर्न सक्दैनन् । जोखिम मोलेर सडकबाटै अर्को किनारामा पुग्नुपर्छ’, उपप्रमुख डंगोलको भनाइ छ– ‘पुलका बार घटाउनु पर्छ । यी बारहरु पारदर्शी हुनुपर्छ । मर्मत गरेर दुरुस्त बनाउनु पर्छ । एक पटक बनाएर अलपत्र बनाएर हुँदेन । नियमित मर्मत गर्नुपर्छ । यसका लागि निर्माण पक्षलाई तत्काल पत्राचार गर्नु ।’
त्यस क्रममा महानगरका निर्देशक नुरनिधि न्यौपानेले सार्वजनिक निजी साझेदारी कार्यक्रमअन्तर्गत सञ्चालनमा रहेका काठमाडौं टावर निर्माण, सार्वजनिक शौचालय निर्माण तथा व्यवस्थापनलगायत योजनाका विषयमा जानकारी गराएका थिए ।
भेटका क्रममा सहरी विकास र व्यवस्थापनमा निजी साझेदारी कहाँ अटाउन सक्छ, त्यसमा यसमा कसरी दुवै पक्षमा हित हुन्छ रु लगायत विषयमा छलफल भएको थियो ।
