कांग्रेस उम्मेदवार नभएको चितवन–३ मा कांग्रेसकै दुई जना प्रभावशाली नेता स्वतन्त्र उम्मेदवार छन् । पार्टीका केन्द्रीय सदस्य रहेका दिनेश कोइराला स्वतन्त्र उठेपछि एमालेले आफ्ना रामप्रसाद न्यौपानेको उम्मेदवारी फिर्ता लिएर कोइरालालाई समर्थन गरेको छ । त्यसैगरी, पुराना नेता जगन्नाथ पौडेल पनि सोही क्षेत्रमा उम्मेदवार छन् । आफ्ना उम्मेदवार रहेको क्षेत्रमा यस्तो हुँदा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल चिन्तित देखिन्छन् । ‘कांग्रेसभित्र अलिकति जटिलता आयो भने मलाई चिन्ता लाग्छ । कांग्रेसभित्रको समस्या हल भइदिए हुन्थ्यो भन्ने हुन्छ । प्रधानमन्त्रीजी र म पटक–पटक कुरा पनि गरेका छौं । सहज वातावरण बनाउनका लागि नै प्रधानमन्त्रीजी नै आउनुभएको हो । म पनि आएको हो,’ सभामा दाहालले भने ।

उनले देशको हितका लागि यी सानातिना कुराहरू थाती राखेर या समाधान गरेर अगाडि बढ्न पनि अपिल गरे । दाहाल अघिल्लो निर्वाचनमा चितवन–३ बाटै प्रतिनिधिसभा सदस्यमा एमालेसँग चुनावी तालमेल गरेर विजयी भएका थिए । गत स्थानीय निर्वाचनमा कांग्रेससँग चुनावी तालमेल गर्दा भरतपुर महानगरमा कांग्रेसभित्र चर्को असन्तुष्टि देखा परेको थियो । यो पटक पनि चितवन–३ बाटै उठ्ने तयारीमा रहेका दाहालले अन्तिम समयमा गोरखा–२ बाट उठ्ने निर्णय लिएका थिए । दाहाल गोरखा गए पनि चितवन कांग्रेसभित्रको असन्तुष्टि रोकिएको छैन ।

विकास कोइराला ०७० को संविधानसभा सदस्य निर्वाचनमा पार्टीका तत्कालीन केन्द्रीय सभापति सुशील कोइरालाविरुद्ध चितवन–४ बाट उठेपछि कारबाहीमा परेका थिए । कारबाही फुकुवाको विषयमा पार्टीका जिल्ला सभापति र भरतपुर नै आएका केन्द्रीय सभापतिसँग दोहोरो कुराकानी नभएको कोइरालाले बताए ।

 -कान्तिपुरका लागि चितवनबाट रमेशकुमार पौडेलले तयार पारेको समाचार