चितवन, कात्तिक १६–
चितवनमा देवी ज्ञवाली र उत्तम जोशीको जुहारी परेको छ । चितवन क्षेत्र नं २ (ख)का प्रदेश सभा सदस्यका उमेदवार देवी ज्ञवालीले आफू विरुद्ध भ्रम नफैलाउन गठबन्धनका उमेदवार उत्तम जोशीलाई आग्रह गरेका छन् । एक कार्यक्रममा बोल्ने क्रममा जोशीले तीन वर्ष भूमि आयोगको अध्यक्ष भएर ज्ञवालीले काम गर्न नसकेको आरोप लगाएपछि अनावश्यक भ्रम नफैलाउन ज्ञवालीले आग्रह गरेका हुन् ।
आफुले डेढ वर्ष मात्रै काम गर्न पाएको र त्यस अवधिमा सकेको जति काम गरेको ज्ञवालीले बताएका छन् । ज्ञवालीले फेसबुकमार्फत ज्ञोशीको आरोपबारे यसरी प्रष्ट पारेका छन् ।
१. कार्यकाल ३ वर्ष रहेको : मलाई तत्कालिन नेपाल सरकारले मिती २०७६।१२।०९ मा भुमि सम्बन्धी समस्या समाधान आयोग, २०७६ को अध्यक्ष भई सुरू ३ वर्ष र थप प्रगती/कार्यसम्पादनका आधारमा २ वर्ष हुने गरि भूमिहिन दलित, भुमिहिन सुकुम्बासी तथा अव्यवस्थित वसोबासीको लगत, तथ्यांक , नाँपजाँच र अन्य प्रकृया सक्ने जिम्मेवारी दिएको थियो । उत्तम भाई उम्मेद्वार रहनुभएको गठबन्धनको सरकार बनेपछि २०७८ को श्रावणमा राजनैतिक प्रतिशोध साँधेर पहिलो प्रहार भूमि आयोग नै विघटन भएर भएको हो । गणितको सामान्य जानकारी हुने व्यक्तिले ३ वर्ष र डेढ वर्ष बीच फरक छुट्याउन सक्छ, उत्तम भाईलाई थाहा नहुने कुरा भएन ।
२. हामीले आयोगमा काम सुरू गर्दा शून्य बाट शुरू गरेका हौँ । कार्यलयको प्रबन्ध, कर्मचारी माग्ने, सरूवा मिलाउने, स्टेशनरी खोज्ने सबै काम आफ्नै सकृयतामा गरियो ।
३. सचिवालय सम्मको व्यवस्थापन नहुँदै पनि हामी मन्त्रालयको माथिल्लो तलामा रहेको मिटिङ रूममा बसेर भूमि नियमावलीको १८ओै संशोधन का लागि काम गरियो, कार्य सम्पादनका लागि अपरिहार्य थियो । स्मरण रहोस हामीले गरेको पहिलो निर्णय बमोजिम कार्यकाल भरि बैठक भत्ता लिएनौ, नयाँ गाडी चढेनौ र करदाताको रू १ पनि फजुल खर्च गरेनौँ । त्यसपछि कार्यप्रणाली कस्तो हुने , त्यसका लागि थुप्रै कार्यविधि बनायौँ । हालको सरकारले सो कार्यविधिहरूमा आयोगको नाम फेरेर उस्तै उतारेको पनि म भाईलाई सार्वजनिक रूपमा जानकारी गराउँछु ।
दवी ज्ञवालीको स्टाटस र उनले सेयर गरेको जोशीको भिडियो :
४. त्यसपछि हामीले स्थानिय तहसँग लगत संकलनका लागि सम्झौता गर्यौँ । कानून अनुसार चाहिँ उत्तम भाईले आशय गरेजस्तो सुरूसुरू लालपूर्जा फटाफट प्रिन्ट गरेर दिन मिल्दैन, सम्पत्तिको हकको व्यवस्थापन रहेकाले निकै लामो चरण पार गर्नु पर्छ है ।
५. हामीले भूमिहिन दलित, सुकुम्बासी र अव्यस्थित वसोबासी गरि देशभर ११ लाख ८० हजार भन्दा बढी परिवारको लगत संकलन गरेका थियौँ ।
६. लगत संकलन गरेर मात्र भएन, जग्गा नाँपजाँच पनि गर्न पनि पर्थ्यो । सो का लागि हामीले देशभरका लागि पुग्ने गरि सर्भेयर तथा प्राविधिक कर्मचारीको व्यवस्थापन गर्नुपर्थ्यो, सो पनि मेरो नेतृत्वको आयोगले गरेको थियो ।
७. धेरै ठाउँमा जग्गा नापजाँचको काम हुँदै थियो, कति ठाउँमा पूर्जा वितरणको अन्तिम तयारी पनि भएको थियो ।
८. तपाईले पनि बुझ्न चाहनुभयो भने बुझ्न सक्ने कुरा के हो भने हालको सरकारले मेरो नेतृत्वमा भएको काम सन्तोषजनक नदेखिएमा मलाई स्पष्टिकरण सोधी हटाउन सक्थ्यो, तर कार्य सन्तोषजनक नभएको भनी देखाउन एउटा पनि आधार थिएन । सो कुरा त हालका गृहमन्त्रीले हामी सँगको अनौपचारिक कुराकानीमा ‘काम त राम्रो गर्नुभयो तर कुरा बुझ्नु न’ भनी भन्नुभएको सन्दर्भ यहिँ मार्फत सार्वजनिक गरेँ । नियोजित भ्रम चिर्न यति प्रष्टिकरण आवश्यक छ है भाइ ।
९. हामीले त्रुटि रहित कार्यसम्पादन होस, तलमाथि नहोस भन्नाका खातिर निकै वैज्ञानिक कार्यविधि र निर्देशिका बनाएका थियौँ । अब मेरो कार्यकालको निकै ठुलो हिस्सा कोभिड १९ को लकडाउन भित्र पर्थ्यो तर पनि सो अवधिमा भएको कार्यसम्पादन हेर्दा केही गरेन भन्न मिल्ला ? हाल बनेको आयोगले नेपालभर आयोगको जिल्ला समिति समेत बनाउन सकेको छैन । गठबन्धनको उम्मेद्वार रहँदै गर्दा आफ्ना तर्फका गठबन्धन सरकारले गरेका काम हेरेर तुलना पनि गर्ने कि ?
१०. हामीले कार्यसम्पादन गर्दै गर्दा मेरो नेतृत्वको आयोगलाई एउटा पनि पत्राचार नगरी, कार्यकसम्पादन सन्तोषजनक भए नभएको सो समेत नबुझि किन आयोग विघटन गरेको भनेर ने।का। सभापति तथा सम्माननिय प्रधानमन्त्रीलाई एकपटक सोधी हेर्न पनि अनुरोध गर्दछु ।
११. हालको सरकारले गठन गरेको आयोगले हामीले गरेको तयारी, सो का आधारमा गरिएका प्राविधिक व्यवस्थापन, लगत आदीलाई नै निरन्तरता सम्म दिएको छ । सो कुरा राष्ट्रिय भुमि आयोग, २०७८ को गठन आदेश हेरेर थाहा पाउन सकिन्छ नै । उत्तम भाईलाई सो को प्रतिलिपि चाहिएमा म सविनय उपलब्ध गराउने नै छु ।
१२. तसर्थ, मेरा प्रतिस्पर्धी रहनुभएका उत्तम भाईलाई म निर्वाचन आचारसंहिता, २०७९ को प्रतिकुल हुने गरि गलत तथ्यको सहारा लिई कोही उम्मेद्वार विरूद्ध भ्रम नफैलाउन विनम्र अनुरोध गर्दछु । हामीसँग बहश गर्न यथेष्ट एजेन्डा छन, हामी चितवनबासीले सभ्य राजनैतिक संस्कारको परिचय पनि दिन सक्छौ । मेरो आग्रह पनि छ । धन्यवाद ।
