माधव सापकोटा
चितवन , असोज ७ –
नेपाललाई सनातन हिन्दुराष्ट्र कायम गर्नुपर्ने, वेदलाई राष्ट्रिय ग्रन्थ घोषणा गर्नुपर्ने, सम्पूर्ण पालिकामा सुरक्षित गोवनको व्यवस्था गर्नुपर्ने लगायत ६ सूत्रीय राष्ट्रिय र नारायणी नदी किनारमा नित्य संचालन भइरहेको महाआरतीस्थललाई आवश्यक सुरक्षित स्थान उपलब्ध गराई महाआरती संचालनार्थ महानगरबाट आर्थिक सहयोगको प्रबन्ध गर्नुपर्ने लगायत ३ बुँदे स्थानीय माग राखी असोज १ गतेदेखि धार्मिक अभियन्ता प्रेमनिधि भारद्वाजले सुरु गर्नुभएको आमरण अनशन आज टुंगिएको छ।
भरतपुर महानगरपालिकाका मेयर रेनु दाहालले २०७६ वैशाख १ गतेदेखि नारायणी नदी किनार नारायणघाटमा नित्य संचालनमा रहेको महाआरतीस्थललाई आवश्यक सुरक्षित स्थान उपलब्ध गराई महाआरती संचालनार्थ महानगरबाट आर्थिक सहयोगको प्रबन्ध गर्ने तथा भरतपुर महानगरबाट प्रदान गरिने छात्रवृत्तिहरू वितरण गर्दा धार्मिक गुरुकुल ,अनाथ आश्रम लगायत संघ-संस्थामा बसेर अध्ययन गर्ने छात्र-छात्राहरूका लागि नि:शुल्क अध्ययन गर्न र अनाथालय संचालन गर्न वार्षिक आर्थिक बजेट प्रदान गर्ने भन्ने प्रतिबद्धता जनाएपछि आमरण अनशन टुंगिएको हो।
स्वामी ज्ञानानन्द सरस्वती र भरतपुर महानगरका मेयर रेनु दाहालबाट नारायणी गण्डकीको जलपान गराएर अनशन समापन गरिएको हो। समापन कार्यक्रममा विश्व हिन्दु महासङ्घका केन्द्रीय सदस्य टंकनाथ पौडेल , संघर्ष समितिका संयोजक शान्तप्रसाद पोखरेल, कोषाध्यक्ष जीवलाल पुरी, प्रवक्ता ध्रुवराज मिश्र, वरिष्ठ भजन गायक हीरालाल कंडेल लगायतको उपस्थिति रहेको थियो । भारद्वाजलगायत चार जना युवाहरूले २०७२ सालमा पनि हिन्दुराष्ट्र घोषणा गर्नुपर्ने माग राखी १७ दिनसम्म काठमाडौँमा अनशन बस्नुभएको थियो। भारद्वाज २०६३ मा नेपाललाई धर्मनिरपेक्ष राज्य घोषणा गरेपश्चात् लगातार हिन्दुराष्ट्रको आन्दोलनमा सक्रिय हुनुहुन्छ।
