– हिरालाल आचार्य ‘डायमण्ड’
चितवन, साउन ९ –
भरतपुरको क्षेत्रपुरमा रहेको फोब्र्स कलेजले विद्यार्थीको भविष्यमाथि खेलबाड गरेको पाइएको छ । कलेजले कुनै पनि विश्वविद्यालयबाट संबन्धन नलिइकन शैक्षिक गतिविधि संचालन गरिरहेको पाइएको हो ।
पाँचौ सेमेष्टरमा अध्ययनरत विद्यार्थी विनिता ढकालले चौंथो सेमेष्टरको परीक्षा अझै नभएको बताइन् । परीक्षा नै नलिई आफूहरुलाई पाँचौ सेमेष्टरमा लगिएको उनले बताइन् । प्लस टु सम्मको विश्वविद्यालय युरोपियन युनिभर्सिटी युर्का (इएचई) स्वीजरल्याण्डसँग कलेजले संबन्धन लिएको पाइएको उनले बताइन् । जसले गर्दा अहिले समस्या सृजना भएको हो ।
‘इक्जाम पनि भएको छैन, यनिभर्सिटी पनि छैन, शिक्षा मन्त्रालयबाट केही एप्रुभ नै नगरी कक्षाहरु सञ्चालन भएको छ’ उनले भनिन् । तेश्रो सेमेष्टरको नतिजा अझै नआएको पनि उनले बताइन् । ६ महिनामा हुनुपर्ने परीक्षा ११ महिनासम्म नहुँदा विद्यार्थीहरु मर्कामा परेको उनको गुनासो छ । अन्तिम तथा आठौं सेमेष्टरमा अध्ययनरत विद्यार्थीहरु अझ मर्का परेको पाइएको छ ।
विद्यार्थीहरुको गुनासोलाई संवोधन गर्दै कलेज प्रशासनको गतिविधिको विरोधमा अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) चितवनले कलेजलमा तालाबन्दी गरेको छ । आज अनेरास्ववियुले तालाबन्दी गरेको हो ।
अनेरास्ववियु चितवनका संयोजक अमित कुमार गुप्ताद्वारा हस्ताक्षरित विज्ञप्ति टाँस्दै कलेजको क्यम्पस प्रमुखको कार्यकक्ष र लेखा शाखामा तालाबन्दी गरिएको हो । विज्ञप्तिमा भनिएको छ, ‘भरतपुर महानगरपालिका– २ क्षेत्रपुरमा रहेको फोब्र्स कलेजमा भएका गतिविधि तथा कलेज प्रशासनबाट विद्यार्थीहरुमा पर्न गएको समस्या तथा शैक्षिक बेथितीका साथै कलेजले कुनै पनि विश्वविद्यालयबाट संबन्धन नलिएर शैक्षिक गतिविधि संचालन गरिरहेको, कोरोना महामारीको समयमा विद्यार्थीहरुलाई कुनै सहुलियत नदिएको, समयमा परिक्षा संचालन नगरेको, विद्यार्थीमा विभिन्न किसिमका भ्रम छरेर अन्योलमा पारेको, कलेजका ३५० भन्दा धेरै विद्यार्थीहरुको शैक्षिक भविष्यलाई अन्योलमय बनाई मानसिक रुपमा विछिप्त बनाएको, चौथो सेमेस्टरको परिक्षा विना नै पाँचौ सेमेस्टरको कक्षा संचालन गरेको, नयाँ विद्यार्थी भर्ना गर्दा कलेजले विद्यार्थीलाई दिने विलमा मिति नराखि ठूलो रकम लिएको आदी विषयहरुका बारे हाम्रो संगठन अनेरास्ववियु जिल्ला कमिटी चितवनको गम्भीर ध्यानाकर्षण भएको छ ।’
शैक्षिक संस्थाको नाममा शैक्षिक माफियाको चङगुलमा विद्यार्थीहरुको भविष्यप्रति गरिएको खेलवाड कुनै पनि हालतमा मान्य नहुने अनेरास्ववियुले जनाएको छ । विद्यार्थीहरुको आग्रहलाई बेवास्ता गरिए जस्तोसुकै प्रतिकार तथा सशक्त सङ्घर्षमा उत्रन बाध्य हुने चेतावनी अनेरास्ववियुले दिएको छ ।
फोब्र्स कलेजका प्रिन्सिपल हरिशरण पाठकले आफूहरु युर्निभर्सिटी परिवर्तनको प्रक्रियामा रहेकाले परीक्षा सञ्चालनमा ढिलाइ भएको बताए । यसअघि युरोपियन युनिभर्सिटी युर्का (इएचई) स्वीजरल्याण्ड E.H.E. European University EurAka Switzerland सँग संबन्ध लिएको भए पनि उक्त युनिभर्सिटीको स्तरियता कम भएकाले परिवर्तन गर्न लागिएको उनले बताए । अब युनिभर्सिटी अफ कम्प्युटर साइन्स एण्ड स्किल्स लड्ज पोल्याण्ड University of Computer Science and Skills Lodz Poland सँग संबन्ध लिन लागेको बताउँदै उनले सबै प्रक्रिया सकिएर अन्तिम चरणमा पुगेका जानकारी दिए ।
सुरुका सेमेष्टर युर्का युनिभर्सिटीबाट दिएको भए पनि त्यसलाई मान्यता दिने गरी आगामी सेमेष्टर नयाँ युनिभर्सिटमा सञ्चालन हुने गरी सम्झौता भइसकेको प्रिन्सिपल पाठक बताउँछन् । बीएचएम र बिएससी (आइटी) अध्यापन गराउने उक्त कलेजमा हाल ३५० जना विद्यार्थी अध्ययनरत छन् ।
हेर्नुहोस्, अनेरास्ववियुको विज्ञप्ति :
