चितवन, साउन २८-
भरतपुर महानगरपालिका–११ को मृगकुञ्ज टोल विकास संस्थाको अध्यक्षमा दिपक रेग्मी चयन भएका छन् ।
संस्थाको आज सम्पन्न दोस्रो अधिवेशन तथा चौथो साधारण सभाले रेग्मीलाई अध्यक्षमा चयन गरेको हो ।
टोलको उपाध्यक्षमा मित्रलाल अधिकारी, सचिवमा मनोज तामाङ, सहसचिवमा राजेन्द्र अधिकारी र बसन्ता घले प्रेमी मगर, कोषाध्यक्षमा सरिता बोहोरा चयन भएका छन् । त्यसैगरी सदस्यहरुमा जीवनाथ पोखरेल, नेत्रबहादुर गुरुङ, सरस्वती भण्डारी, कविता घिमिरे, रामकुमारी तामाङ, जीवनबाबु श्रेष्ठ र शान्ता रेग्मी रहेका छन् ।
टोलविकास संस्थाका अध्यक्ष कुलबहादुर तामाङको अध्यक्षतामा भएको अधिवेशनमा भरतपुर महानगरपालिका–११ की वडा सदस्य लालमाया लामाले शुभकामना मन्तब्य राख्दै वडाको समग्र विकासको लागि प्रत्येक टोलको महत्वपूर्ण भूमिका रहने बताइन् । उनले वडाका हरेक जनप्रतिनिधिहरुलाई सचेत गराउन टोल विकास संस्थाले खबरदारी गर्न जरुरी रहेको विचार राखिन् । कार्यक्रममा ११ नम्बर वडाका निवर्तमान वडा अध्यक्ष बाबुराम अधिकारी, नेकपा एमाले भरतपुर महानगरपालिका वडा नम्बर ११ का वडा सचिव ईश्वरी पण्डित, नेपाली कांग्रेस भरतपुर महानगरपालिका वडा नम्बर ११ का उपसभापति विष्णुप्रसाद न्यौपाने, नेकपा माओवादी केन्द्रका वडा सचिव सन्देशले शुभकामना मन्तव्य राख्दै टोल विकास संस्था कुनै राजनीतिक दलको मात्र एकलौटी प्रतिनिधित्व हुने भन्दा पनि सबैको सामूहिक प्रतिनिधित्व हुने निष्पक्ष संस्था बन्नुपर्ने विचार राखे । मृगकुञ्ज टोलका सल्लाहकारहरु तथा पूर्वअध्यक्षहरुबाट डिलबहादुर सापकोटा, भिमबहादुर कुमाल र ईन्द्रबहादुर बोहोराले मन्तव्य राखेका थिए । त्यसैगरी मृगकुञ्ज टोलका छिमेकी टोलहरुमध्ये जखेडीमाई टोलकी अध्यक्ष कमला अर्याल र ज्ञानज्योति टोलका अध्यक्ष मोहननिधि तिवारीले वरिपरिका टोलहरुले विकास निर्माणको कार्यक्रममा हातेमालो गर्दै अगाडि बढ्नुपर्ने विचार राखे ।
आमा समूहकी अध्यक्ष सम्झना रेग्मीले स्वागत मन्तव्य राखेको कार्यक्रममा टोल विकास संस्थाका सचिव मधुसूदन दवाडीले सचिवको प्रतिवेदन र कोषाध्यक्ष लक्ष्मी निरौला आचार्यले कोषाध्यक्षको प्रतिवेदन प्रस्तुत गरेका थिए । बाबुराम न्यौपानेको संयोजकत्वमा बनेको निर्वाचन मण्डलले निर्विरोध हुन नसकेका पदहरुमा गोलाप्रथा गरेर नयाँ कार्यकारी समिति चयन गरिएको थियो ।
