चितवन, साउन २५ –
वीरेन्द्र क्याम्पसको प्रशासनले भ्रष्टाचार गरेको भन्दै अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) ले क्याम्पसमा तालाबन्दी गरेको छ ।
आज एक विज्ञप्ति टाँस्दै अनेरास्ववियुले क्याम्पस प्रमुखको कार्यकक्ष र लेखा शाखामा तालबन्दी गरेको हो ।
अनेरास्ववियु क्याम्पस कमिटीका अध्यक्ष सुदिप पौडेलद्वारा जारी विज्ञप्तिमा ‘भ्रष्टचारी, अनियमित, अपारदर्शी क्याम्पस प्रशासनले विद्यार्थीबाट रु. ५०० स्वास्थ्य शुल्क लिने तर त्रिवुभन विश्वविद्यालयमा विगत १० वर्षदेखि उक्त शुल्क नपठाउने र विद्यार्थीहरुले स्वास्थ्य बीमामार्फत पाउनुपर्ने रु १००,००० सम्मको सेवा सुविधा समेत आजको मितिसम्म नदिएको’ भनिएको छ ।
त्रिविका अन्य आंगिका क्याम्पसहरुले उक्त शुल्क त्रिविमा पठाएर विद्यार्थीहरुलाई सुविधा दिइरहेको र वीरेन्द्रमा यसो नुहुन दुखःद कुरा रहेको अध्यक्ष सुदिप पौडेलले विज्ञप्तिमार्फत जनाएका छन् ।
अनेरास्ववियुले हिजो २४ घण्टे अल्टिमेटम दिँदै क्याम्पस प्रशासन समक्ष २३ बुँदे माग राखेको थियो । उक्त मागहरुलाई वेवास्ता गरेकाले तालाबन्दी गर्न बाध्य भएको विज्ञप्तिमा जनाइएको छ । त्यसको बुँदामा स्वास्थ्य बीमाको कुरा पनि उल्लेख गरिएको छ ।
माग पूरा गर्न चरणवद्धरुपमा संघर्षका कार्यक्रम अघि बढाइएको अनेरास्ववियुले जनाएको छ । माग पूरा नगरे अन्य थप संघर्षका कार्यक्रम अघि बढाउने र सबै प्रशासन पनि ठप्प पार्नै सम्मको चेतावनी अनेरास्ववियुले दिएको छ ।
अनेरास्वियुले विगत तीन वर्षदेखि क्याम्पसमा कुनै तालाबन्दी गरेको थिएन । यसअघि पनि पटकपटक क्याम्पस प्रशासन समक्ष खबरदारी गर्दै आए पनि माग पूरा नहुँदा बाध्य भएर तालाबन्दी गरेको अनेरास्ववियुले जनाएको छ ।
हेर्नुहोस्, विज्ञप्ति :
२३ बुँदे मागसहितको विज्ञप्ति हेर्नुहोस्,