चितवन, साउन २४-
चितवनको खैरहनीमा नेपाली कांग्रेस नगर सचिवसहित १४० जनाले हिजो सोमबार पाटी सदस्यसमेत नरहने गरी सामूहिक राजीनामा दिएका छन् ।
नेपाली कांग्रेस खैरहनी नगर सचिव तथा खैरहनी २ वडा सभापति टीकादत्त इटनीसहित वडा उपसभापति, क्षेत्रीय प्रतिनिधि, निवर्तमान सल्लाहकार, निवर्तमान सचिव, महिला संघ निवर्तमान सहसचिवलगायतले साधारण सदस्यतासमेत नरहने गरी राजीनामा दिएका हुन् ।
वैशाखमा सम्पन्न स्थानीय तह निर्वाचनमा टिकट बाँडफाटमा विभेद गरेको भन्दै राजीनामा दिएको बुझिएको छ ।
टिकटकै विषयलाई लिएर अहिले सामूहिक राजीनामा आएको हुन सक्ने कांग्रेसका नेताहरुको बुझाइ छ ।
खैरहनीमा नगर प्रमुखमा दाबेदार १२ जनामध्ये अहिले निर्वाचित प्रमुख शशी खनिया एकातिर र नगर सभापतिसहित बाँकी ११ जना अर्को खेमामा उभिएका छन् ।
निर्वाचित भएको करिब तीन महिना भैसक्दा पनि प्रमुखले कुनै सल्लाहसमेत नलिएको उनीहरुको गुनासो छ ।
