– पूजा परियार
चितवन, साउन १३- पछिल्लो समय आत्महत्याका घटनाहरु बढ्दै गएका छन् । प्रत्येक दिनजसो आत्महत्याका समाचारहरु पढ्न र सुन्नु परेको छ । यसले समाजमा नै खलल पु¥याउने काम गरिरहेको छ ।
जिल्ला प्रहरी कार्यालय चितवनको तथ्याङ्कलाई आधार मान्दा चितवनमा आत्महत्या गर्नेहरुको संख्या हरेक बर्ष बढ्दै गइरहेको देखिएको छ । कार्यालयका अनुसार गत बर्ष २०७८/०७९ मा ११५ जनाले आत्महत्या गरेका छन् । आत्महत्या गर्नेहरुमा महिला, बालिका तथा पुरुषहरुको संख्या नै बढी छ ।
यस्तै, आर्थिक बर्ष २०७७/७८ मा १०७ जना, २०७६/०७७ मा १७८ जना, २०७५/०७६ मा १५९ जना, २०७४/०७५ मा १३९ जनाले आत्महत्या गरेको देखिन्छ । यो तथ्याङ्क प्रहरीसम्म आएको जानकारी मात्रै को हो ।
प्रहरीलाई जानकारी गराए पोष्टमार्टम लगायतका कानुनी प्रक्रियाहरु पूरा गर्नुपर्ने झण्झटिलो तथा खर्चिलोमा हुने भएकाले स्वाभाविक मृत्युु भन्दै अन्तिम संस्कार गर्ने चलनले पनि कतिपय घटना प्रहरीसम्म आउदैनन् । यदि सबै घटनाको अभिलेखीकरण हुने हो भने यो संख्या अझ बढी हुन सक्ने प्रहरीको भनाइ छ ।
कतिपय अवस्थामा आत्महत्यालाई हत्या भएको भन्दै मुद्दा परेका घटनाहरु पनि छन् ।
आत्महत्यालाई आफ्नो माग पूरा गराउने सौदाबाजीको रुपमा पनि प्रयोग गर्ने गरेको पाइएको जिल्ला प्रहरी कार्यालय चितवनका प्रमुख प्रहरी नायब उपरीक्षक (डिएसपी) नरहरी अधिकारीले बताउनुभयो ।
आत्महत्याका कारण :
त्यसो त आत्महत्याको एउटै कारण सवै व्यक्तिमा लागू हुन्छ भन्ने हुँदैन ।
मायामा धोका, पढाइमा असफल, उदासिनता, एक्लोपन, रक्सी र अन्य लागु औषधीको दुरुपयोग, दीर्घरोगी, मानसिक स्वास्थ्य समस्या, द्वन्द्व, घरेलु हिंसा, आफन्तको मृत्यु, गरिबी, बेरोजगारीजस्ता कारणले व्यक्ति आत्महत्याको तहसम्म पुग्ने गरेको पाइन्छ ।
अझै, पछिल्लो समय सामाजिक सञ्जाल र सञ्चार उपकरणहरुको दुरुपयोग, वैदेशिक रोजगारी, विवाहपछिको सम्बन्ध, सम्बन्ध बिच्छेद पनि अर्को महत्वपूर्ण कारण बन्न पुगेको चितवनका डिएसपी नरहरी अधिकारी बताउनुहुन्छ ।
आत्महत्या रोक्न के गर्ने ?
आत्महत्या पूर्ण रुपमा रोकथाम गर्न नसकिएता पनि यसलाई धेरै मात्रामा रोकथाम तथा न्यूनीकरण गर्न भने सकिन्छ ।
दिर्घ रोगी तथा मानसिक बिरामी भएका व्यक्तिलाई उचित स्वास्थ्य सेवा उपलव्ध गराउने, रोजगारीको अवसरमा बृद्धि गर्ने, मादक पदार्थ र लागू पदार्थ दूव्र्यसनीहरुलाई सूधार केन्द्रमा राख्ने, उचित परार्मश दिने, सामाजिक संञ्जालको सदुपयोग गर्ने, कसैलाई पनि छिटो विश्वास नगर्ने, श्रीमानश्रीमतीले एकअर्कालाई विश्वास गर्ने, शान्ति सूरक्षा प्रदान, पारिवारिक सम्बन्धलाई बलियो बनाउने हो भने आत्महत्यालाई केही हदसम्म भए पनि रोक्न सकिने जानकारहरु बताउँछन् ।
आत्महत्या रोजगार, बेरोजगार, यूवा, यूवती, बूढापाका, धनी, गरिब सबैखाले मान्छेले गरेको पाइन्छ । त्यसैले सम्बन्धित सबै सरोकार निकायहरुले आआफ्नो ठाउँबाट पहल गर्नु जरुरी छ ।
