चितवन, साउन ७-
गत बर्ष रोजगारीका लागि विदेश पुगेका ५ लाखबढी नेपाली स्वदेश फर्किएका छन् ।
अघिल्लो आर्थिक बर्षमा कोभिड-१९ का कारण अलपत्र परेका, रोजगारी गुमाएका तथा शोषणमा परेका ५ लाख ७२ हजार ५७१ नेपाली स्वदेश फर्किएका हुन् ।
कोभिड १९ संकट व्यवस्थापन केन्द्रले सार्वजनिक गरेको तथ्याङ्क अनुसार युएइबाट १ लाख ६० हजार ४७० जनाको उद्धार गरिएको छ ।
त्यस्तै, कतारबाट १ लाख ४८ हजार ७९०, साउदी अरबियाबाट ५२ हजार ७६८, कुवेतबाट २९ हजार ५८२, ओमानबाट ७ हजार ३५१, बहराइनबाट १ हजार ७०७, मलेसियाबाट ६१ हजार ९६१ र अन्य मुलुकबाट १ लाख ९९ हजार २४ जनाको उद्धार गरिएको जनाएको छ ।
यसरी विदेश पुगेर पनि फर्कनेमा खाडीको कतार, युएई, कुवेत, ओमान, बहराइन, साउदी अरबिया, मलेसियालगायत देशहरु अघि रहेको तथ्याङ्कले देखाएको छ ।
यता, पछिल्लो समय नक्कली कागजात वा गलत प्रक्रिया अपनाइ, भिजिट भिसा वा इन्ट्री भिसाकोआडमा वैदेशिक रोजगार विभागको बिना स्विकृति रोजगारका लागि विदेश जाँदा पनि धेरै नेपालीहरु फर्कने गरेका छन् ।
विदेश जाँदा नेपालबाट भनेको काम नभई अर्कै पर्ने, तलब भनेजति नपाउने, बिचमै कम्पनी बन्द हुने र कामदार आफैँले काम खोज्नुपर्ने वा काम नपाए छोटो समयमै स्वदेश फर्किनुपर्ने बाध्यता समेत पछिल्लो समय मौलाउँदो रुपमा रहेको छ ।
आज ‘शनिबार’ भरतपुरमा आयोजना गरिएको ‘वैदेशिक रोजगार कानुनसम्बन्धी सञ्चारकर्मीहरुका लागि अभिमुखीकरण’ कार्यक्रममा सो कुराको जानकारी गराइएको हो ।कार्यक्रममा बोल्दै चितवनका सांसद कृष्णभक्त पोखरेलले सरकारले विदेशजाने प्रवृत्तिलाई रोक्न नसकेपनि सरकारले विदेश पुगेका आफ्ना नागरिकलाई सुरक्षित बनाउन हर पहल गर्नुपर्ने बताउनुभयो ।
कार्यक्रम मानव अधिकारका लागि जनमञ्च ‘पिपुल फोरम’को आयोजना तथा आइआरइएक्सको सहयोगमा गरिएको हो ।
पिपुल फोरमका संस्थापक एवं अधिवक्ता सोम लुइँटेलले कार्यक्रममा आफ्नो प्रस्तुती प्रस्तुत गर्दै विदेशमा नेपालीहरुको श्रम शोषण तथा चेलिबेटी वेचबिखनको क्रम बढ्दै गएको बताउनुभयो ।
यस्तै, ‘पिपुल फोरम’का कार्यक्रम संयोजक तथा अधिबक्ता पुरुषोत्तम प्रजापति एवं आर्थिक अभियान दैनिकका सम्पादक रुद्र खड्काले वैदेशिक रोजगारी, कामको प्रकृति, श्रम आप्रवासन प्रक्रिया र चक्र, नेपालमा वैदेशिक रोजगारीका चुनौती, वैदेशिक रोजगारीमा संचारकर्मीहरुको भुमिका लगायतका विषयवस्तु समेटिएको प्रस्तुती राख्नुभएको थियो ।
कार्यक्रममा चितवनका संचारकर्मीहरुको उपस्थिती रहेको थियो ।