एजेन्सी, साउन २-
इरानका स्वास्थ्यमन्त्रीले कोभिड १९ महामारीको सातौँ लहर आएको जानकारी दिएका छन् । इरानमा स्वास्थ्यमन्त्री बहराम एइनोल्लाहीले इरानमा कोरोना महामारीको सातौँ लहर सुरु भएको बताएका हुन्।
पत्रकार सम्मेलनमा उनले देशमा कोरोना महामारीको सातौँ लहर सुरु भएकाले थप सतर्कता अपनाउन आग्रह गरेका छन् ।
उनले सबै इरानीहरुलाई कोभिडको खोपको बुस्टर मात्रा लिन र महामारीबाट बच्नका लागि आवश्यक स्वास्थ्यका मापदण्डहरु अपनाउन आग्रह गरेका छन्।
स्वास्थ्यमन्त्री बहरामले आइतबार मात्र पाँच हजार ७०० भन्दा बढी नागरिकमा कोभिडको सङ्क्रमण देखा परेको र आइतबार मात्र १३ जनाको ज्यान गएको बताएका छन्।
ती नयाँ संक्रमितहरुमध्ये ६ सय भन्दा बढीलाई अस्पताल भर्ना गर्नु परेको जानकरी पनि उनले दिएका छन् । इरानमा अहिलेसम्म ७२ लाखभन्दा बढी मानिस सङ्क्रमित भएका छन् भने १ लाख ४१ हजारभन्दा बढी नागरिकको ज्यान गएको छ ।
