“बढी मूल्य लिने र ठगी गर्नेहरूविरुद्ध जिल्ला प्रशासन कार्यालयमार्फत कारबाही भइरहेको र केही सिलिन्डरहरू समेत बरामद गरिएको छ,” सचिव बुर्लाकोटीले भने ।

स्वच्छ बजार र उपभोक्ता हितमा उद्योगमन्त्री सिन्हाको जोड
उद्योग, वाणिज्य तथा आपूर्तिमन्त्री अनिलकुमार सिन्हाले बजारमा देखिएको विकृति अन्त्य र पूर्वाधार विकासमा निजी क्षेत्रसँग सहकार्य गर्न सरकार तयार रहेको बताए । उनले कालोबजारी, कृत्रिम अभाव र सिन्डिकेटजस्ता विकृतिलाई कुनै पनि हालतमा छुट नदिइने प्रस्ट पारे ।

उपभोक्ता हितविपरीत कार्य गर्नेलाई कानुनबमोजिम कडा कारबाही गरिने उनले बताए । “उपभोक्ता अधिकारलाई मौलिक हकको रूपमा स्थापित गर्न र स्वच्छ बजार कायम राख्न जरुरी छ,” मन्त्री सिन्हाले भने, “नेपालको संविधानको धारा ४४ ले प्रत्येक उपभोक्तालाई गुणस्तरीय वस्तु र सेवा प्राप्त गर्ने हक सुनिश्चित गरेको छ । उपभोक्ता संरक्षण ऐन, २०७५ र नियमावलीहरू कार्यान्वयनमा रहेको छ ।”

उनले खेतदेखि भान्छासम्मको यो शृंखलालाई स्वस्थ बनाउन उद्योगी, व्यवसायीलाई आग्रह गरे । उपभोक्तालाई पनि वस्तुको उत्पादन, उपभोग्य मिति र मूल्य हेरेर मात्र खरिद गर्न उनले सचेत गराए ।

मुलुकको आपूर्ति व्यवस्था अझै पनि चुनौतीपूर्ण रहेको स्वीकार गर्दै मन्त्री सिन्हाले कम्तीमा तीन महिनाका निम्ति खाद्यान्न र पेट्रोलियम पदार्थको भण्डारण क्षमता बढाउन आवश्यक रहेको बताए ।