नवलपुर/गैँडाकोट,पुस १६ –
नगरलाई उद्योग, व्यापार, पर्यटन र संस्कृतिसहितका सम्भावनाहरुको केन्द्रका रुपमा स्थापित गर्ने उद्देश्यसहित यही पुस २५ देखि माघ १० गतेसम्म सञ्चालन हुने चौथो गैँडाकोट महोत्सवको तयारी तीब्र पारिएको छ । नारायणी नदीकिनारमा आयोजना गरिएको महोत्सवको तयारी तीब्र पारिएको हो । महोत्सवका सबै तयारी अन्तिम चरणमा पुगेको आयोजक उद्योग वाणिज्य संघ गैडाकोटले जानकारी दिएको छ ।
महोत्सवका संयोजक छविलाल कँडेलका अनुसार महोत्सवमा करिब २५० व्यावसायिक कक्ष रहने छन् । दुई हप्तासम्म चल्ने महोत्सवबाट करिब दुई लाख दर्शकले अवलोकन गर्ने र करिब २५ करोड कारोबार हुने प्रक्षेपण गरिएको उहाँले बताउनुभयो । अटोमोबाइल, बैंक तथा वित्तीय संस्था, मोबाइल–इलेक्ट्रोनिक्स, निर्माण सामग्री, हस्तकला, कृषि तथा जडीबुटी, पर्यटन, तयारी पोसाक, जुत्ता–चप्पलदेखि दैनिक उपभोग्य वस्तुसम्मका सामग्री प्रदर्शनमा राखिने छन् ।
घरेलु, साना, मझौला तथा ठूला उद्योगसँगै बङ्गलादेश, पाकिस्तान र भारतका प्रदर्शकहरुको समेत विशेष सहभागिता रहने आयोजकले जनाएको छ । ‘महोत्सवले स्थानीय होटल, रेस्टुरेन्ट, यातायात, किराना, कृषि उत्पादन, हस्तकला तथा साना उद्यमहरुको व्यापारमा प्रत्यक्ष वृद्धि गर्नेछ’, कँडेलले भन्नुभयो, ‘यसले स्थानीयस्तरमा व्यापारसँगै रोजगारी सिर्जना गर्नुका साथै आयआर्जनमा समेत योगदान पु¥याउन सक्छ ।’
महोत्सवलाई यसवर्ष थप व्यवस्थित तरिकाले सञ्चालन गर्नका लागि चार भागमा विभाजन गरिएको आयोजकले जनाएको छ । प्रदर्शनी तथा बिक्री कक्ष, सांस्कृतिक तथा साङ्गीतिक क्षेत्र, बाल उद्यान र खानपान क्षेत्रलाई छुट्टाछुट्टै तरिकाले व्यवस्थापन गरिने महोत्सवका संयोजक कँडेलले जानकारी दिनुभयो ।
त्यतिमात्र नभई गैँडाकोट क्षेत्रमा हुने मेला–महोत्सवले समग्र गैँडाकोट नगर क्षेत्रकै आर्थिक अवस्थालाई चलायमान बनाउनमा महत्वपूर्ण भूमिका खेल्ने उहाँको भनाइ छ ।
राष्ट्रियस्तरका कलाकारहरुको प्रस्तुति, फेसन शो, विद्यालय तथा विभिन्न कला केन्द्रका सांस्कृतिक कार्यक्रम, बाल उद्यानमा विभिन्न साहसिक तथा मनोरञ्जनात्मक खेल, जलपरी, माछाका एक्वेरियम र ओपेरा हाउस जस्ता आकर्षणहरुले महोत्सवलाई परिवारमै रमाउने केन्द्रका रुपमा प्रस्तुत गर्ने तयारी गरिएको महोत्सवका प्रचारप्रसार संयोजक शालिकराम सापकोटाले जानकारी दिनुभयो । उहाँका अनुसार महोत्सवको प्रवेशद्वारलाई कलात्मक शैलीमा निर्माण गर्ने तयारी गरिएको छ । गैडाकोट क्षेत्रमा रहेर राष्ट्रिय स्तरमा ख्यातिप्राप्त सहकारी र संघसंस्थालाई समेत महोत्सवमार्फत प्रबद्र्धन गरिने उहाँले बताउनुभयो ।
महोत्सवले उपभोक्ता र उत्पादकलाई प्रत्यक्षरुपमा एकै स्थानमा भेट गराउने अवसर प्रदान गर्ने हुँदा औद्योगिक तथा व्यापारिक गतिविधिको केन्द्रको रुपमा समेत विकसित गर्ने लक्ष्य लिइएको उद्योग वाणिज्य संघ गैडाकोटका महासचिव तेजनारायण पाण्डेले बताउनुभयो । नयाँ प्रविधि, लगानी र उत्पादनसम्बन्धी जानकारी आदानप्रदानमा पनि महत्वपूर्ण भूमिका खेल्ने विश्वास गरिएको उहाँले बताउनुभयो ।
गण्डकी प्रदेशको सामाजिक, प्राकृतिक, सांस्कृतिक एवम् आर्थिक विविधताको प्रवेशद्वार मानिने गैँडाकोट पछिल्लो समय फस्टाउँदै गरेको तीव्र औद्योगीकरण, पर्यटन वृद्धि र व्यापारिक गतिविधिका कारण प्रदेशकै आकर्षक नगरका रुपमा उदाउँदै गएको छ । त्यसका साथै नारायणी नदीकिनारको सुन्दर काखमा महोत्सव आयोजना गरिँदा धार्मिक एवम् सांस्कृतिक हिसाबले पनि सकारात्मक मानिने हुँदा यसले समाजमा सकारात्मक प्रभाव पार्दै आएको आयोजकको दाबी छ ।
