काठमाडौं, असोज ९-
मुग्लिन–नारायणगढ सडकखण्डअन्तर्गत चितवनको इच्छाकामना गाउँपालिका–५, तुइन खोला पुल नजिक पहिरो ६० प्रतिशत पन्छाइएको छ ।
सडक डिभिजन भरतपुरका अनुसरा हाल सम्म ६० प्रतिशत पहिरो पन्छाइएको र रातिसम्म सञ्चालन गर्ने तयारी रहेको छ ।
“काम गर्ने क्षेत्र साँघुरो भएकोले गर्दा एकपटकमा दुवैतर्फबाट कुल पाँचवटा उपकरणले मात्रै काम गर्न सक्ने अवस्था रहेको छ,” सडक डिभिजनले आज (बिहीबार असोज ९) दिउँसो पौने ३ बजे जारी गरेको सूचनामा उल्लेख छ ।
“पहिरोको थुप्रोमा ढुंगाहरूको मात्रा बढी भएको र स–साना तिखा ढुंगाहरूका कारण टायर पन्चर हुने, ढुंगाले लागेर अपरेटर घाइते हुनेजस्ता समस्याहरूले गर्दा सोचेअनुसारको प्रगति हुन नसकिएकोले हेभी इक्प्युमेन्ट डिभिजन हेटौँडा र डुम्रेबाट दुईजना अपरेटरहरू पनि थप गरिएको छ,” सडक डिभिजनले भनेको छ ।
“कुनै पनि बाधा आई नपरे निरन्तर रूपमा कार्य गर्न सकिएको खण्डमा सम्भवतः आज रातिसम्ममा पूर्ण रूपमा पहिरो हटाई आवागमन सञ्चालनमा ल्याउने आकलन गरिएको छ,” सडक डिभिजनले भनेको छ ।
