चितवन, भदौ ६ –
भाद्र २०–२२ गते ललितपुरको गोदावरी हलमा नेकपा एमालेको विधान अधिवेशन हुँदैछ । उक्त विधान अधिवेशनमा विधानमा समावेश गर्नुपर्ने र संशोधन गर्नुपर्ने विषयमा चितवनका पालिकाहरुमा धमाधम बैठक बसिरहेको छ ।
भदौ २ गते जिल्ला कमिटी चितवनको बैठक सम्पन्न भएको थियो । त्यसपछि धमाधम पालिका कमिटीहरुको बैठक बसेको हो । एमाले चितवनका प्रचार विभाग प्रमुख प्रकाश आचार्यका अनुसार चितवनका सात वटा पालिका मध्ये ६ वटा पालिकामा बैठक सम्पन्न भइसकेको छ ।
भरतपुर महानगरपालिका, माडी नगरपालिका, रत्ननगर नगरपालिका, कालिका नगरपालिका, खैरहनी नगरपालिका र राप्ती नगरपालिकामा पालिका कमिटी बैठक सम्पन्न भएको छ । इच्छाकामना गाउँपालिकाको बैठक बस्न बाँकी छ ।
बैठकमा आएका सुझावहरुलाई लिखित रुपमा जिल्ला पार्टीलाई पठाउने र जिल्लामार्फत केन्द्रमा पठाइने एमालेले जनाएको छ ।
आज नेकपा एमाले जिल्ला कमिटी चितवनको सभाहलमा भरतपुर महानगर कमिटीले बैठक सम्पन्न गरेको छ । विधान संशोधनका सम्बन्धमा यस अघि सम्पन्न जिल्ला कमिटी बैठकमा उठेका विषयहरु नै महानगर कमिटीको बैठकमा पनि उठेको एमाले चितवनका प्रचार विभाग प्रमुख आचार्यले जानकारी दिए ।
उनका अनुसार राष्ट्रको सम्मानित व्यक्तिलाई संविधानले नै पार्टी राजनीति गर्न नपाउने प्रष्ट व्यवस्था गर्नुपर्ने, भ्रष्टाचारमा मुछिएर विवादमा आएका नेता कार्यकर्ताको सदस्यता खारेज गर्ने व्यवस्था गर्नुपर्ने, जिल्ला जिल्लामा सम्पर्क मञ्च गठन गर्ने र त्यसको मान्यता दिनुपर्ने व्यवस्था गर्ने, क्षेत्र र प्रदेश समन्वय कमिटीलाई कार्यकारी अधिकार दिने व्यवस्था गर्नुपर्ने, समाजवादी मोडलमा जाने स्पष्ट योजना बनाउने, विधानमा संसोधन गरी १ पार्टी सदस्य र अर्काे पार्टी संगठित सदस्य बन्न पाउने व्यवस्था गर्नुपर्ने, युवा र विद्यार्थीमा उमेरको हद राखिसकेपछि पार्टीमा पनि उमेर हद राख्दा राम्रो हुने लगायतका सुझाव महानगर कमिटीका नेताहरुले बैठकमा दिएका छन् ।
‘अन्य पालिका कमिटीका नेताहरुले पनि यस्तै खाले सुझावहरु बैठकमा दिएका छन्’ प्रचार विभाग प्रमुख आचार्यले भने ।
एमाले भरतपुरका अध्यक्ष शंकर थपलियाको अध्यक्षतामा आज सम्पन्न भरतपुर महानगर कमिटीको बैठकमा एमाले केन्द्रीय सदस्यहरु जेएन थपलिया, केन्द्रीय सल्लाहकार सदस्य वाबुराम खराल, भूमि विभागका सचिव विजय सुवेदी, एमाले प्रदेश कमिटी सदस्य एवम् महानगर इन्चार्ज राम प्रसाद न्यौपाने, प्रदेश कमिटी सदस्य अस्मिन घिमिरे, पार्टी जिल्ला सचिव प्रकाश ढुंगाना उप सचिव मिन बहादुर परियार, जिल्ला सचिवालय सदस्य एवम् प्रचार विभाग प्रमुख प्रकाश आचार्य, सचिवालय सदस्य एवम् विद्यार्थी मोर्चा फाँट प्रमुख अनोज जोशी लगायको उपस्थिति रहेको थियो । बैठकलाई पार्टी महानगर कमिटी सचिव अशोक ज्ञवालीले सञ्चालन गरेका थिए । 
