चितवन, साउन ३० –
नेकपा एमाले निकट राष्ट्रिय युवा संघ नेपाल जिल्ला कमिटी चितवनको स्वास्थ्य विभागद्वारा आयोजित रक्तदान कार्यक्रम सम्पन्न भएको छ ।
आज शुक्रबार भरतपुरको चौबिसकोठीमा सम्पन्न रक्तदान कार्यक्रममा १५२ जनाले रक्तदान गरेका कार्यक्रम संयोजक संजिल लामिछानले जानकारी दिए ।
राष्ट्रिय युवा संघ नेपाल केन्द्रीय कमिटीले सञ्चालन गरिरहेको देशव्यापी रक्तदान महाअभियानकै क्रममा चितवनमा पनि खुला रक्तादान कार्यक्रम आयोजना गरिएको संघका जिल्ला अध्यक्ष झलकराज भट्टले बताए ।
झलकराज भट्टको अध्यक्षतामा सम्पन्न रक्तदान कार्यक्रममा प्रमुख अतिथिका रुपमा राष्ट्रिय युवा संघ नेपालकी केन्द्रीय सदस्य एवम् चितवन जिल्ला इन्चार्ज अमृता भट्टराई, एमाले केन्द्रीय सदस्य जेएन थपलिया, एमाले चितवनका अध्यक्ष कमल पाठकसहित युवा संघ र पार्टीका विभिन्न तहका नेता कार्यकर्ता, एमालेका विभिन्न जनवर्गिय संगठनका नेता कार्यकर्तासहित रक्तदानसँग सम्बन्धित सामाजिक संघसंस्थाका प्रतिनिधि, स्वास्थ्यकर्मी लगायतको उपस्थिति रहेको थियो ।
