सौराहा,साउन २७-
चितवनको पर्यटकीय नगरी सौराहामा हात्तीलाई वनभोज खुवाइएको छ । १४ औं अन्तर्राष्ट्रिय हात्ती दिवस २०२५ को अवसरमा बागमारा मध्यवर्ती सामुदायिक वन उपभोक्ता समूहको परिसरमा मंगलबार आयोजित कार्यक्रममा हात्तीलाई मनपर्ने परिकारको वनभोज खुवाइएको हो । युनाईटेड हात्ती संचालन सहकारी संस्था लिमिटेडको आयोजनामा भएको वनभोजमा सरकारी र नीजि ६० वटा हात्ती सहभागि थिए ।
हात्तीलाई उखु, गाजर, बन्दा, ड्रागन, स्याउ, फर्सीलगायत विभिन्न खानेकुरा खुवाइएको आयोजक युनाईटेड हात्ती संचालन सहकारी संस्था लिमिटेडका अध्यक्ष दीपेन्द्र प्रसाद खतिवडाले जानकारी दिनुभयो । एक दिन भए पनि सबै प्रकारका खानेकुरा एकै समयमा सबै हात्तीलाई खुवाउँदा मनोरञ्जन हुनुका साथै हात्तीले पनि सबै खानाको स्वाद लिन पाउने भएकाले वनभोज कार्यक्रम राखिएको उहाँले बताउनुभयो । “जसरी हामी वनभोज खान जाँदा रमाउँछौँ, त्यसरी नै हात्तीलाई मनपर्ने खानेकुरा खुवाउँदा हात्ती खुसी हुन्छन”, उहाँले भन्नुभयो, “राम्रो खुवाउने र स्याहार गर्नुपर्छ भन्ने सन्देश पनि हो यो ।” उहाँले हात्तीलाई काम मात्र लगाउने होइन पालनपोषण पनि गर्ने गरिन्छ भन्ने सन्देश वनभोजले दिने बताउनुभयो । मानिस र जनावरबिचको सम्बन्ध राम्रो बनाउन वनभोज महत्वपूर्ण रहेको खतिवडाको भनाई छ ।
चितवन राष्ट्रिय निकुन्जका प्रमुख संरक्षण अधिकृत डा.गणेश पन्तले हात्ती विनाको संरक्षण कल्पना गर्न नसकिने बताउनुभयो । उहाँले नेपालमा जंगली हात्तीको संख्या बढ्दै गइरहेको भन्दै संरक्षण र व्यवस्थापनामा ध्यान दिनुपर्ने बताउनुभयो । हात्तीको संरक्षणविना निकुन्जको संरक्षण हुन नसक्ने उहाँको भनाई छ । चितवन राष्ट्रिय निकुञ्ज, मध्यवर्ती सामुदायिक वन र यससँगै बग्ने नदीमा रहेका वन्यजन्तु, चराचुरुङ्गी, जलचरलगायतको अवलोकन गर्न बर्सेनि सौराहामा स्वदेशी तथा विदेशी पर्यटक आउने गर्दछन् ।
