चितवन, साउन २६ –
चितवनको कृषि तथा वन विज्ञान विश्वविद्यालय रामपुरमा चिनियाँ सहयोगमा वर्णशङ्कर धानको परीक्षण रोपाइँ गरिएको छ । चीनको छोङ चिङ कृषि विज्ञान प्रतिष्ठानले विकास गरेको ३७ जातका वर्णशङ्कर धान आज विश्वविद्यालयमा परीक्षणका लागि रोपिएको हो । नेपालका लागि चिनियाँ राजदूत चेन सोङ्गको प्रमुख उपस्थितिमा आज सोमबार रोपाईं गरिएको हो ।
नेपालमा विकास गरिएको एउटा र प्रचलनमा रहेका आठ जातका धान रोपिएको छ । हरेक जातका धानको ३०० ग्राम बीउ उत्पादन गरी विश्वविद्यालयको परिसरमा रोपिएको हो ।
धान रोपाइँ सरु गर्नुअघि आयोजित कार्यक्रममा नेपालका लागि चिनियाँ राजदूत सोङ्गले यो धान नेपालमा परीक्षण गरेर उत्पादन गर्न लाग्नु चीनका लागि गर्वको विषय भएको बताए । चीनले ७० वर्षको उपलब्धिका रूपमा यस धानको बिउलाई लिएको उनले बताए । यसरी चीनले निकै मिहिनेत गरेर प्राप्त गरेको उपलब्धि नेपाललाई उपहार स्वरुप दिएको उनको भनाइ छ ।
यसले उत्पादनको क्षेत्रमा नेपालको सपना साकार हुने विश्वास व्यक्त गर्दै राजदूत सोङ्गले आउँदा वर्षहरुमा नेपालको धान उत्पादनमा वृद्धि गर्न सहयोग पुर्याउने बताए ।
भरतपुर महानगरपालिकाका प्रमुख रेनु दाहालले आगामी दिनमा भरतपुर महानगर र देशकै लागि यो परियोजना कोसेढुङ्गा साबित विश्वास व्यक्त गरिन् ।
कृषि तथा वन विज्ञान विश्वविद्यालयका उपकुलपति प्रा डा शारदा थपलियाले परीक्षण सफल भएमा यसले नेपालको धान उत्पादनमा सहयोग पुग्ने बताइन् ।
कार्यक्रममा विश्वविद्यालयका रजिष्ट्रार पुष्करबहादुर पाल, चाइना फाउन्डेसन फर रुलर डेभलपमेन्टका कन्ट्री डाइरेक्टर जाओ जियाङ, परियोजनाका कार्यक्षेत्र संयोजक राजु खरेल लगायतले संवोधन गरेका थिए ।
संयोजक खरेलका अनुसार परीक्षणका रूपमा रोपिएका वर्णशङ्कर धानमध्ये राम्रो फल्ने धानलाई नेपालका विभिन्न ठाउँमा रोप्न सकिनेछ । यस क्रममा कृषकलाई तालिमसमेत दिइँदै छ । विश्वविद्यालयले नेपालमा अधिकतम प्रचलनमा रहेका जात र चिनियाँ वर्णशङ्करलाई सँगै उत्पादन गरेर अध्ययन गरी उपयुक्त जात सिफारिससमेत गर्न सक्ने छ ।
खरेलका अनुसार नेपालमा हालसम्म एउटा मात्रै वर्णशङ्कर धानको बीउ उत्पादन भई प्रचलनमा आएको छ । त्यो जात हर्दिनाथ हाइब्रिड एक हो । अन्य देशबाट आयात गरि कृषकले अरु विभिन्न जातका धान प्रयोग गर्ने गरेका छन् ।
आफ्नै देशमा परीक्षण गरिएको जातको धान लगाउँदा उत्पादन वृद्धि हुने र किसान वर्गलाई ठूलो लाभ मिल्ने विश्वास गरिएको छ ।
